Detyrën e kryetarit e dorëzoi muaj më parë.
Por për aq sa udhëhoqi Mitrovicën e veriut, Erden Atiq, tha se bëri punë të mëdha.
E atë që e nisi thotë se s’po e vazhdon pushteti pasues.
Madje ka kritika se, edhe disa shërbime komunale që i la, ia pezulluan.
“Ka ndryshime në aspektin negativ, ka rezistencë prej pushtetit aktual që me i pengu proceset e ndryshme. Diksastret që kanë të bëjnë me dhënien e pronave dhe dhënien e lejeve, aty qytetarët janë ankuar që ka raste kur nuk i regjistrojnë lëndët, nuk marrin përgjigje për lejen adekuate”, thotë ish-kryetari i Mitrovicës së Veriut, Erden Atiq.
Hiq i kënaqur me qeverisjen në komunën që e udhëhoqi, s’është as Izmir Zeqiri.
Ky thotë se puna në Zubin Potok ka ngecur që kur e dorëzoi detyrën.
“Nuk po shoh një dinamikë të punës ose një zhvillim sepse këtë kanë kapacitete më të mëdha se të mijat, sepse unë kam pasur një ekip të ngushtë, dhe këta e kanë kuvendin me shumicë absolute, por edhe kuadër sepse i kanë njerëzit e tyre sepse tek unë as nuk kanë konkurruar”, thotë ish-kryetari i Zubin Potokut, Izmir Zeqiri.
Punë ndoshta jo por situata e sigurisë, vlerësohet e qetë nga Policia.
Madje edhe bashkëpunimi i qytetarëve me ta thonë se është goxha në nivel.
“Situata është e qetë por gjithmonë delikate për shkak të ngjarjeve që kanë ndodhur në viteve e kaluara, por tash mbretëron një situatë e qetë. Sa i përket bashkëpunimit është në nivel, kemi raste edhe të raportimeve”, thotë shefi i Planifikimit Rajonal të Policisë së Kosovës, Erduan Baliqi.
Falë bashkëpunimit, policia gjeti një sasi të konsiderueshme armatimi ditëve ë fundit në pjesën veriore, kryesisht në komunën e Zubin Potokut.
