Profesori Fatmir Çollaku ka kritikuar klasën politike në Kosovë, duke e cilësuar si “garniturë politike me njerëz të papërgjegjshëm”, në një kohë kur vendi po përballet me afatin kushtetues për zgjedhjen e presidentit.
Sipas tij, qytetarët po presin zgjidhjen e ngërçit politik dhe kthimin e stabilitetit institucional.
“Si qytetarë jemi duke pritur që të përfundojë ky ngërç politik dhe vendi të kthehet në stabilitet. Garnitura politike nuk duhet të ketë luksin e shfryrjes së inateve politike, qoftë në pozitë apo opozitë. Vendi nuk pret”, ka deklaruar Çollaku.
Ai thekson se zhvillimet në rajon dhe më gjerë kërkojnë përgjegjësi më të lartë nga liderët politikë në Kosovë.
“Nuk do të duhej të kemi këtë luks të merremi me polemika dhe fajësime të ndërsjella. Duhet konsensus politik, sepse çështja e vendit është primare”, shtoi ai.
Ndërkohë që kanë mbetur edhe katër ditë deri në përfundimin e afatit për zgjedhjen e presidentit, subjektet kryesore politike nuk kanë dhënë sinjale për arritjen e një marrëveshjeje. Në rast të mosarritjes së konsensusit, vendi mund të shkojë në zgjedhje të parakohshme parlamentare. /teve1.info/
