Nënkryetarja e Kuvendit të Kosovës nga radhët e Partisë Demokratike, Vlora Çitaku, ka vlerësuar figurën e ish-kongresistit amerikan Eliot Engel, duke theksuar ndikimin e tij në ndërgjegjen ndërkombëtare për Kosovën.
“Eliot Engel kishte bërë atë që shumë pak njerëz arrijnë ta bëjnë në politikë. Kishte lënë gjurmë në ndërgjegjen e njerëzve. Nuk kisha detyrë vetëm të krijoja miq, por t’i nderoja miqësitë që Eliot Engel kishte krijuar për ne,” tha Çitaku.
Ajo vuri në dukje se Engel ishte zëri që mbështeti Kosovën në ditët më të vështira të okupimit dhe që tregoi besim për të ardhmen e vendit.
“Kur një popull i vogël dëgjohet pa qenë i pranishëm, kur historia e tij rrëfehet nga të tjerët me besueshmëri, atëherë kjo histori ka gjetur një zë të vërtetë. Ky zë për ne ishte Eliot Engel,” shtoi ajo.
Çitaku kujtoi edhe deklaratën profetike të Engel gjatë luftës.
“Shumë shpejt, Kosova do të çlirohet. Unë do ta vizitoj Kosovën, por ju dhe Serbia do ta keni të ndaluar të hyni në Kosovë.”
