Kuvendi i Kosovës ka miratuar në seancën e sotme Projektligjin për Provimin e Maturës Shtetërore.
Projektligji është votuar nga 66 deputetë, pa asnjë votë kundër dhe pa abstenime.
Gjatë diskutimeve, shefja e Grupit Parlamentar të Lidhjes Demokratike të Kosovës (LDK), Jehona Lushaku-Sadriu, theksoi se projektligji përmban disa mangësi.
Megjithatë, ajo bëri të ditur se grupi parlamentar që ajo përfaqëson e ka përkrahur miratimin e tij.
Ndryshe, Kuvendi i Kosovës në seancën e sotme plenare ka miratuar në lexim të dytë një sërë projektligjesh të rëndësishme, që prekin fusha të ndryshme si ekonomia,shëndetësia, arsimi dhe çështjet sociale, ndërsa debatet janë karakterizuar nga qëndrime të ndryshme mes pozitës dhe opozitës.
Ndër projektligjet e miratuara është ai për Masat e Përkohshme të Produkteve Themelore në Raste të Veçanta të Destabilizimit në Treg, i njohur si ligji për “çmimet tavan”, i cili u votua me 63 vota për, pa kundërshtime dhe abstenime.
Me mbështetje të gjerë është miratuar edhe Projektligji për Sigurimin e Detyrueshëm të Kujdesit Shëndetësor me 80 vota për, pa asnjë kundër apo abstenim.
Kuvendi ka miratuar gjithashtu Projektligjin për Lojërat Mesdhetare “Prishtina 2030” me 64 vota për, si dhe Projektligjin për Shtetësinë e Kosovës me 69 vota për, dy kundër dhe asnjë abstenim, për të cilin pati kundërshtime nga partitë opozitare lidhur me procedurat dhe përmbajtjen.
Po ashtu, deputetët kanë votuar edhe disa projektligje të tjera, përfshirë atë për Financimin e Menaxhimit të Resurseve Ujore (68 vota për), për Banim Social dhe të Përballueshëm (71 vota për), si dhe Projektligjin për Lëndët Plasëse (72 vota për).
Seanca u karakterizua nga diskutime të shumta, ndërsa shumica parlamentare siguroi votat për miratimin e projektligjeve, pavarësisht kritikave dhe rezervave të shprehura nga opozita.
