Partia Demokratike e Kosovës ka shprehur ngushëllime për ndarjen nga jeta të akademikut Rexhep Qosja, duke e cilësuar atë si një nga figurat më të rëndësishme të mendimit shkencor dhe kulturor shqiptar.
Në telegramin e ngushëllimit të kryetarit të PDK-së, Bedri Hamza, thuhet se vdekja e tij përbën humbje të madhe jo vetëm për familjen, por edhe për gjithë Kosovën dhe kombin shqiptar.
“Me pikëllim të thellë mora lajmin për ndarjen nga jeta të akademikut Rexhep Qosja. Humbja e tij është e madhe jo vetëm për familjen tuaj, por edhe për Kosovën dhe mbarë kombin shqiptar”, thuhet në letrën e ngushëllimit.
Hamza e ka vlerësuar Qosjen si një akademik të shquar që ka lënë gjurmë të thella në fushën e dijes dhe kulturës shqiptare.
“Si akademik i shquar, ai dha kontribut të jashtëzakonshëm në mendimin shkencor dhe kulturor shqiptar, duke lënë pas një trashëgimi të çmuar dhe të pazëvendësueshme për brezat që vijnë”, thekson ai.
Në telegram përmendet edhe roli i tij si mendimtar i angazhuar në çështjet kombëtare dhe shoqërore, duke kontribuar në rritjen e vetëdijes kombëtare.
“Si mendimtar i angazhuar në çështjet politike, akademik Rexhep Qosja kontribuoi edhe në rritjen e ndërgjegjes kombëtare dhe në përpjekjet për liri e barazi të popullit tonë”, thuhet më tej në mesazh.
Në fund të telegramit, Hamza i ka shprehur ngushëllime familjes Qosja, duke theksuar se kujtimi dhe vepra e tij do të mbeten të përhershme.
“Në këto momente të rënda për ju, ju lutem pranoni ngushëllimet e mia më të sinqerta. Kujtimi dhe vepra e akademikut Rexhep Qosja do të mbeten të përhershme”, përfundon telegrami i Bedri Hamzës.
