Deputeti i PDK-së, Valon Hoti, në emisionin “Këndi i debatit” në Tëvë1, ka komentuar deklaratat e krerëve të LDK-së dhe PDK-së pas takimeve me kryeministrin Albin Kurti për zgjedhjen e presidentit.
Hoti u shpreh se këto deklarata janë të ndikuara nga kalkulimet për zgjedhjet e ardhshme dhe jo nga vullneti për të zgjidhur ngërçin institucional.
“Këto deklarata janë në dritën e zgjedhjeve të ardhshme, sepse ata ashtu e shohin tash situatën dhe nuk marrin mundin që të japin kontribut që të ecim tutje, ta zgjidhim këtë ngërç dhe të kemi situatë institucionale stabile për katër vitet e ardhshme,” ka deklaruar Hoti.
Sipas tij, deklaratat e tilla janë më shumë tentim për pozicionim politik sesa për zgjidhje konkrete.
“Deklarata të tilla tashmë janë imponim ose tentim për t’u futur në lojë politike. Po flasim për një proces që për muaj të tërë ka qenë i bllokuar, ndërkohë që janë dhënë deklarata për fitore të thellë, por rezultati nuk ka reflektuar atë që është thënë,” ka shtuar ai.
Ai theksoi gjithashtu se emri i Glauk Konjufca si kandidat për president nuk është i rastësishëm.
“Glauk Konjufca nuk është çfarëdo emri i propozuar për president, sepse është personi i dytë më i votuar,” ka thënë Hoti.
Tutje, deputeti i PDK-së kritikoi opozitën për mungesë propozimesh konkrete, duke kërkuar të paktën pjesëmarrje në proces.
“Këta nuk japin asnjë emër që ne të mos e bëjmë Glauk Konjufcën si të propozuar. Ne kemi dhënë emra, si p.sh. Andin Hoti. Nga opozita kërkojmë të paktën minimumin: edhe nëse nuk kanë një emër, të qëndrojnë në sallë, sepse nuk po japin asnjë alternativë,” ka përfunduar Hoti./teve1.info/
