Në kuadër të vizitës zyrtare në Bruksel, ministrja e Drejtësisë, Donika Gërvalla, ka zhvilluar një takim me Drejtorin e Përgjithshëm të Komisionit Evropian për Negociatat e Fqinjësisë dhe Zgjerimit, Gert Jan Koopman.
Sipas njoftimit të bërë nga ministrja në Facebook, në qendër të diskutimeve kanë qenë reformat në sistemin e drejtësisë në Kosovë, përfshirë funksionalizimin e Byrosë Shtetërore për Verifikimin dhe Konfiskimin e Pasurisë së Pajustifikueshme, procesi i vetingut, si dhe paketa prej pesë projektligjesh që aktualisht janë në konsultim publik.
Gërvalla ka theksuar se këto reforma synojnë forcimin e integritetit institucional dhe transformimin afatgjatë të sistemit të drejtësisë në vend, me qëllim rritjen e besimit të qytetarëve në institucionet gjyqësore.
Ajo ka nënvizuar gjithashtu rëndësinë e mbështetjes së vazhdueshme nga Bashkimi Evropian në avancimin e sundimit të ligjit dhe në përmbushjen e standardeve të procesit të integrimit evropian, duke e cilësuar progresin në drejtësi si element kyç të këtij procesi.
“Republika e Kosovës mbetet e palëkundur në orientimin e saj evropian, përmes forcimit të sistemit të drejtësisë dhe sundimit të ligjit, si shtylla thelbësore të këtij procesi”, ka deklaruar Gërvalla në fund të postimit të saj./teve1.info/
