Zyra e Kryeministrit ka njoftuar se gjatë takimit Kurti ka vlerësuar Italinë si partner dhe aleat në Bashkimin Evropian dhe NATO, teksa e vlerësoi kontributin dhe ndihmën e tyre dhënë Kosovës përmes BE-së dhe NATO-s.
“Duke potencuar marrëdhëniet e shkëlqyeshme bilaterale ndërmjet Kosovës dhe Italisë, Kryeministri Kurti shprehu mirënjohjen për ndihmën dhe përkrahjen e vazhdueshme të Italisë për vendin tonë. Duke vlerësuar Italinë si partner dhe aleat edhe në BE dhe NATO, kryeministri vlerësoi kontributin dhe ndihmën e Italisë për Kosovën, dhënë nëpërmjet Bashkimit Evropian dhe NATO-s. Ai theksoi vullnetin e Qeverisë së Republikës së Kosovës për rritje të shkëmbimeve tregtare mes dy shteteve dhe gatishmërinë për tërheqje të investimeve në Kosovë”, thuhet ndër tjerash në njoftim.
Kurse, italiani ka falënderuar Kurtin për pritjen teksa të dy u pajtuan se demokracia është mënyra më e mirë për të arritur rritje ekonomike.
“Nënsekretari italian i Shtetit, falënderoi kryeministrin Kurti për pritjen. Duke biseduar për indikatorët pozitiv ekonomik, të dy u pajtuan se demokracia është mënyra më e mirë për të arritur rritje ekonomike. Z.Della Vedova përgëzoi Kryeministrin për pozicionimin e qartë të Qeverisë së Republikës së Kosovës dhe vendosjen e sanksioneve ndaj Federatës Ruse. Në takim u theksua domosdoshmëria e parandalimit të ndikimit rus në rajonin e Ballkanit Perëndimor”, njofton tutje ZKM-ja./teve1.info/
