Ka 27-vite që prehen në këto varreza.
Në Velani, këtë të shtunë u përkujtuan dëshmorët e Prishtinës.
Për homazhe, aty u panë shumë familjarë e përfaqësues institucionesh.
Në mesin e tyre i pranishëm qe edhe kryetari Përparim Rama.
Por dikush, atij tentoi t’ia ndalojë hyrjen.
Djali i dëshmori Behxhet Brajshori tregoi më pas arsyen e këtij veprimi.
“Unë përmes shoqatave të dala nga lufta kam aplikuar për një lokacion në Parkun e Dragodoanit, për me bë një kioskë për familje…Kur ka ardhur LDK në pushtet dhe ma kanë lënë projektin në proces dhe në fund ma kanë refuzu…te varrezat e dëshmorëve vijnë sa për kamera, për neve nuk bëjnë asgjë”, deklaroi djali i dëshmorit, Xhevdet Brajshori.
Pas kësaj ndodhie, homazhet vazhduan.
“Kemi ardhë edhe këtë vit ta bëjmë nderin tonë në shenjë të madhe për respektin e tyre dhe familjeve të tyre për sakrificën për vendin tonë, për paqe në vendin tonë”, tha Rama.
E me lot në sy foli edhe ish-komandanti i UÇK-së, Adem Shehu.
“Pata fatin luftova me këta djemë, këto dhimbje dhe duhet me marr forcë për t’iu afruar vitalitetit dhe ky varr flet më tepër”, tregoi Shehu.
I pranishëm ishte edhe ministri i mbrojtjes, Ejup Maqedonci, i cili përkujtoi bashkëluftëtarët.
“Pjesën më të madhe të dëshmorëve që po i përkujtojmë sot i kam pas bashkëluftëtarë, kemi bashkëluftu bashkë, kemi bashkëvepruar bashkë dhe më të vërtetë është nder për secilin që vjen dhe respekton ata të cilët ishin bazamenti i ushtrisë sonë, bazamenti i lirisë sonë dhe ne sot po ndërtojmë një ushtri, po fuqizojmë një ushtri i cila bazament gjithmonë do të ketë gjakun e derdhur të dëshmorëve, Ushtrinë Çlirimtare të Kosovës”, u shpreh ai.
Nga varrezat e Dëshmorëve në Velani, u ritheksua nevoja e një padie ndaj Serbisë.
“Një gjë ka mbetur mangu, Serbia nga këtu është shporrë por drejtësia nuk është vu në vend ende dhe përmes dokumentimit të këtyre vlerave ne duhet të bëjmë padi ndaj Serbisë dhe ne duhet me kërkua drejtësi ndaj të rënëve në liri”, tha ministri Andin Hoti.
Dita e Dëshmorëve të Komunës së Prishtinës shënohet çdo vit më 18 Prill, duke nderuar sakrificën e atyre që dhanë jetën për lirinë e Kosovës.
