Votat e nevojshme s’i mori asnjëri.
Andaj konkursi për dy gjyqtarë në Gjykatën Kushtetuese, duhet të kthehet edhe njëherë nga fillimi.
Kjo Gjykatë, edhe për një kohë do të vazhdojë me minimumin e anëtarëve për kuorum.
Por kjo situatë vlerësohet goxha shqetësuese, veçanërisht nëse vendi shkon në zgjedhje të reja parlamentare.
“Gjykata Kushtetuese ka me rreziku me funksionu me minimumin e gjyqtarëve në përbërje në ndërkohë ne do të rrezikojmë që në rast se një situatë e tillë përsëritet edhe dy apo tri herë të tjera pas një Kuvendi të ri, ne rrezikojmë të mbesim pa gjyqtarë të Gjykatës Kushtetuese në gusht të 2027-tës”, tha hulumtuesi në IKD, Naim Jakaj.
Megjithatë, edhe pse e rrezikshme, vlerësohet se s’kishte meritokraci në procesin e përzgjedhjes.
“Nuk ka qenë një konkurs fer, për arsye se ajo çfarë kemi parë, kandidati që ka qenë më i miri Zahir Qerkini u rendit i fundit në ndërkohë që do të duhej të ishte kandidati i parë. Nga ajo që kemi parë pastaj, numri 1 dhe 2 nuk kanë qenë adekuat në kuptimin e profesionalizmit”.
E emrat e propozuar, sipas profesorit Jeton Kelmendi tregojnë për një tentim kapjeje të këtij institucioni nga partia në pushtet.
“Kjo tentativë duhet të ndalohet me çdo kusht, që të mos kapen institucionet e pavarura, të mos kapet Gjykata Kushtetuese dhe KPM-ja, janë disa institucione që duhet të jetë të pavarura pavarësisht dëshirave dhe apetiteve të partisë në pushtet”, thotë profesori Jeton Kelmendi.
Aktualisht janë 7 gjyqtarë në Gjykatën Kushtetuese, ndërkaq që 5 prej tyre, iu skadon mandati në gusht të vitit të ardhshëm.
