Nëse jo zgjidhje, zgjedhje.
Vendi rrezikon t’i nënshtrohet edhe një procesi tjetër zgjedhor, nëse deri më 28 prill vendi nuk bëhet me president të ri.
Veçse as zgjedhjet, s’konsiderohen zgjidhje.
Vendi vlerësohet se mund të ketë dëme të mëdha në aspektin ekonomik.
“Nuk është në pyetje vetëm kostoja financiare, por është aspekti i paralizimit të administratës, aspekti i angazhimit të infrastrukturës në zgjedhje, dhe e tëra kjo ndikon në rënien e performancës së funksionimit të administratës publike apo politizimi lë gjurmë negative fal burokracisë edhe tek sektori privat dhe qytetarët”, thotë eksperti i ekonomisë, Safet Gërxhaliu.
Por jo vetëm dëme të brendshme.
Një palë zgjedhje tjera, thuhet se dëmtojnë vendin edhe në arenën ndërkombëtare.
“Nuk po evitohen krizat por po krijohen kriza të reja politike në vend, sepse qeveria aktuale do të kalojë si qeveri teknike dhe në arenën ndërkombëtare do të shihet si një vend me jostabilitet politik, veçanërisht brenda tryezave të BE-së, do të shihet si palë joserioze dhe jo e gatshme për të vazhduar proceset përpara”, thotë njohësi i politikave të jashtme, Elbasan Osmani.
Por në vend një proces zgjedhor, ka edhe një kosto të majme parash.
Për organizimin e mbarëvajtjen, Komisionit Qendror të Zgjedhjeve i duhen mesatarisht 10 milionë euro.
