Një përleshje fizike mes tre personave ka përfunduar me të lënduar dhe sekuestrim të një arme zjarri në Ferizaj.
Sipas njoftimit të policisë, rasti ka ndodhur në fshatin Doganaj, ku pas një mosmarrëveshjeje verbale lidhur me punime pranë një prone, situata ka eskaluar në dhunë fizike.
Në vendin e ngjarjes kanë ndërhyrë njësitet policore, të cilat kanë identifikuar tre persona të përfshirë në rast: M.H (47), V.H (43) dhe A.H (71). Si pasojë e përleshjes, të tre kanë pësuar lëndime trupore dhe kanë marrë trajtim mjekësor në QKMF-në e Ferizajt.
Gjatë trajtimit të rastit, policia ka pranuar informacione se njëri nga të dyshuarit posedonte armë pa leje. Më pas, i dyshuari A.H. ka dorëzuar një pistoletë dhe 15 fishekë, të cilat janë sekuestruar nga autoritetet.
Me autorizim të prokurorit të shtetit, është iniciuar rast për veprat penale “Lëndim i lehtë trupor” dhe “Mbajtje në pronësi, kontroll ose posedim të paautorizuar të armëve”, ndërsa hetimet janë duke vazhduar.
