Komisioni Qendror i Zgjedhjeve ka miratuar regjistrimin e një partie të re politike në vend, duke e çuar në 53 numrin e subjekteve të regjistruara.
Bëhet fjalë për Partinë Qytetare për Mirëqenie Sociale (PQMS), një iniciativë qytetare që udhëhiqet nga Sali Salihu.
Sipas njoftimit të KQZ-së, para miratimit është kryer një proces i detajuar verifikimi i dokumentacionit të dorëzuar nga iniciativa politike. Ky proces ka përfshirë shqyrtimin e statutit, programit politik, aktit të themelimit, simbolit, raportit financiar, si dhe listave të nënshkrimeve të mbështetësve të regjistruar.
Po ashtu, është konfirmuar pagesa e taksës së regjistrimit në vlerë prej 500 eurosh.
KQZ ka bërë të ditur se gjatë shqyrtimit janë dhënë komente dhe kërkesa për plotësime, për të cilat iniciativës i është lënë një afat prej pesë ditësh. Brenda këtij afati, përfaqësuesit e saj kanë dorëzuar ndryshimet e kërkuara dhe dokumentacionin e plotësuar.
