Kryesuesi i Këshillit Prokurorial të Kosovës (KPK), Arian Gashi, së bashku me zëvendëskryesuesin Dardan Vuniqi dhe anëtarë të tjerë, kanë pritur në takim drejtorin e Agjencisë për Parandalimin e Korrupsionit (APK), Yll Buleshkaj, me bashkëpunëtorët e tij.
Gjatë takimit u theksua rëndësia e forcimit të bashkëpunimit ndërinstitucional në funksion të luftës kundër korrupsionit dhe avancimit të sundimit të ligjit në Kosovë.
Gashi ka vlerësuar bashkëpunimin e deritanishëm ndërmjet dy institucioneve, duke theksuar se koordinimi në rastet që lidhen me deklarimin dhe verifikimin e pasurisë, si dhe konfliktin e interesit, ka kontribuar në ndërmarrjen e veprimeve konkrete prokuroriale.
“Bashkëbiseduesit vlerësuan gjithashtu rëndësinë e shkëmbimit të informacionit dhe zhvillimit të aktiviteteve të përbashkëta, përfshirë trajnimet dhe ngritjen e kapaciteteve profesionale, të cilat kanë ndikuar në forcimin e integritetit institucional dhe rritjen e efikasitetit në trajtimin e rasteve të korrupsionit”, thuhet në komunikatë.
Palët u dakorduan për thellimin e mëtejmë të bashkëpunimit përmes mekanizmave të koordinuar dhe reagimit në kohë, me qëllim trajtimin sa më efektiv dhe profesional të rasteve.
Me këtë rast, drejtori i APK-së, Yll Buleshkaj, ka theksuar se bashkëpunimi i ngushtë ndërinstitucional është thelbësor për parandalimin dhe luftimin e korrupsionit, duke shtuar se Agjencia mbetet e përkushtuar për të rritur transparencën dhe llogaridhënien në institucionet publike.
Ndërkaq, Gashi ka ritheksuar se KPK mbetet i përkushtuar për forcimin e partneritetit me institucionet relevante, në funksion të ndërtimit të një sistemi drejtësie më të fortë, më transparent dhe më efikas.
