Ish-shefi i Grupit Parlamentar të Lidhja Demokratike e Kosovës, Arben Gashi, nuk është pjesë e Kryesisë së re të kësaj partie.
Përveç tij, në listën prej 34 anëtarësh mungon edhe ish-deputeti Driton Selmanaj.
Pas publikimit të përbërjes së re të Kryesisë, Gashi ka reaguar përmes rrjetit social Facebook, duke konfirmuar se nuk është pjesë e saj dhe duke shpalosur qëndrimet e tij lidhur me zhvillimet brenda partisë.
“Unë nuk jam pjesë e Kryesisë së re të LDK-së”, ka shkruar Gashi.
Ai ka theksuar se që nga përfundimi i zgjedhjeve të shkurtit 2025 ka ngritur shqetësime brenda strukturave të partisë për gjendjen e brendshme dhe humbjen e besimit.
“Këto propozime nuk gjetën përkrahje në votim, edhe pse realiteti u pranua në fjalë”, ka deklaruar ai.
Gashi ka shtuar se ka kërkuar unitet dhe jo përjashtime, duke theksuar nevojën për një qasje të re politike.
“Sot e them pa dilemë: Hendeku mes LDK-së dhe votuesit nuk është rastësi, është pasojë e mungesës së guximit për të ndryshuar në kohë”, ka shkruar ai.
Sipas tij, partisë i nevojitet një fillim i ri.
“Një cikël politik ka përfunduar. LDK-së i duhet një cikël i ri, me lidership dhe energji të re, me besim të rikthyer mbi vlerat e saj autentike”, është shprehur Gashi.
Në fund, ai ka theksuar se do të vazhdojë angazhimin e tij politik, duke qëndruar, siç tha, “në anën e parimeve, të votuesit dhe të së vërtetës”.
