Prokuroria e Speciale e Kosovës ka kërkuar dënim të përjetshëm për tre të akuzuarit për sulmin terroristë në Banjskë.
Kërkesa e Prokurorisë është bërë në seancën e së mërkurës në Gjykatën Themelore në Prishtinë, në fjalën përfundimtare të saj.
Prokurori special Naim Abazi, tha se Prokuroria është e bindur se provat janë të qarta dhe se dënimi nuk mund të jetë më i ulët se ai maksimal.
“Drejtësia në këtë rast nuk është çështje simbolike, ajo është në mbrojte të shtetit ligjor, të rendit kushtetues, në mbrojtjet të jetës së atyre që në emër të shtetit zbatojnë ligjin dhe garantojnë sigurinë qytetare. Prokuroria e përfundon fjalën me bindjen se provat janë të qarta. Kur një zyrtar policor bie në krye të detyrës si pasojë e një sulmi të organizuar kundër rendit kushtetues, përgjegjësia e drejtësisë nuk mund të jetë më e ulët se dënimi maksimal i paraparë”, tha Abazi.
Burgim të përjetshëm për të akuzuarit kanë kërkuar edhe mbrojtja e të dëmtuarave.
Blagoje Spasojeviq, Vladimir Toliq dhe Dushan Maksimoviq, përballen me akuza të rënda për përfshirje në ngjarjet e 24 shtatorit 2023, në fshatin Banjskë të Komunës së Zveçanit. /teve1.info/
