Ministrja e Industrisë, Ndërmarrësisë dhe Tregtisë, Mimoza Kusari-Lila, gjatë vizitës së saj në Hagë të Holandës, ka vlerësuar se Kosova po shënon përparim të dukshëm si një ekonomi e re dhe dinamike, me orientim të qartë drejt reformave dhe përmirësimit të klimës së investimeve.
Sipas saj, kjo vizitë ishte e suksesshme dhe pritet të ndikojë në forcimin e bashkëpunimit ekonomik ndërmjet Kosovës dhe Holandës.
Ajo ka theksuar se, së bashku me ambasadorët dhe përfaqësues të biznesit nga të dy vendet, është përmbyllur me sukses “Dita e Biznesit të Kosovës”, e cila u vlerësua si një platformë e rëndësishme për thellimin e marrëdhënieve ekonomike bilaterale.
Kusari-Lila ka deklaruar se Kosova po avancon drejt një ekonomie konkurruese, inovative dhe të qëndrueshme, duke përmendur rritjen e investimeve të huaja, si dhe rolin gjithnjë e më të madh të sektorit të TIK-ut dhe eksportit të shërbimeve si motorë të zhvillimit ekonomik dhe punësimit.
Ajo ka shtuar se përmes transformimit digjital, “Politikës Industriale 2030” dhe zhvillimit të zonave moderne ekonomike, po krijohen kushte më të favorshme për biznes dhe inovacion, me fokus të veçantë tek gratë dhe të rinjtë ndërmarrës.
Ministrja gjithashtu bëri të ditur se në aktivitet morën pjesë përfaqësues të ndryshëm të institucioneve dhe biznesit, të cilët prezantuan potencialet dhe asetet e Kosovës si destinacion për investime të huaja.
Një nga zhvillimet kryesore të vizitës, sipas saj, ishte themelimi i Dhomës Ekonomike të Bizneseve Kosovë–Holandë në Hagë, e cila pritet të shërbejë si mekanizëm i rëndësishëm për lehtësimin e bashkëpunimit ekonomik, nxitjen e investimeve dhe krijimin e partneriteteve të reja mes bizneseve të dy vendeve.
Në përmbyllje, Kusari-Lila ka nënvizuar se Kosova mbetet e hapur për biznes dhe partneritet ndërkombëtar, duke ftuar investitorët e huaj që të eksplorojnë mundësitë që ofron vendi dhe të bëhen pjesë e zhvillimit ekonomik të tij.
