Deputeti i Lëvizjes Vetëvendosje, Adnan Rrustemi, në emisionin “Info Nata” në Tëvë1 ka folur për çështjen e Asociacionit dhe kritikat e opozitës ndaj Qeverisë Kurti.
Ai tha se interpretimet e opozitës për Asociacionin janë të pasakta, duke theksuar se procesi i integrimit në veri është duke vazhduar.
“E para nuk është kompromis në asnjë mënyrë, është lexim i pasaktë. Është fillimi i integrimit të shërbimeve të mbetura paralele në veri”, tha Rrustemi.
Sipas tij, në veri janë shkatërruar shumë struktura paralele dhe procesi i integrimit po vazhdon në disa sektorë.
“Janë shkatërruar të gjitha strukturat paralele në pjesën e veriut, si Posta e Serbisë, bankat e Serbisë, dinari, barrikadat etj. Veriu i Kosovës është transformuar duke u lejuar integrimi institucional”, u shpreh ai.
Rrustemi shtoi se ligji për të huajt dhe integrimi i shërbimeve shëndetësore dhe arsimore është pjesë e këtij procesi.
“Shërbimet sociale, arsimi dhe shëndetësia kanë ngelur për t’u integruar. Ky është fillimi i integrimit të tyre”, tha ai.
Ai përmendi edhe ligjin për targat si shembull të proceseve të mëhershme, të cilat sipas tij fillimisht u kritikuan, por më pas u zbatuan.
“Kur është bërë ligji për targat ka pasur reagime dhe presion, por më pas është zbatuar. Sot nuk ka më makina me targa të vjetra”, tha Rrustemi.
Duke komentuar opozitën dhe proceset politike, ai tha se kritikat për Asociacionin janë të përsëritura ndër vite.
“Opozita ka thënë për Asociacionin çdo tre muaj gjatë këtyre pesë viteve të qeverisjes”, u shpreh ai.
Rrustemi theksoi se LVV ka ardhur në pushtet me fokus në luftën kundër korrupsionit dhe reformat institucionale.
“VV ka ardhur në pushtet për luftën kundër korrupsionit, konfiskimin e pasurisë së pajustifikueshme dhe reformat transformuese në secilën sferë”, tha ai.
Në fund, ai deklaroi se sipas tij, nëse Asociacioni do të realizohej në kushtet që kërkon opozita, çështja e presidentit do të zgjidhej shumë shpejt.
“Nëse do të bëhej Asociacioni dhe nëse do të ishte korrupsioni si në kohën e qeverisjes së opozitës, çështja e presidentit do të zgjidhej për 24 orë”, deklaroi Rrustemi.
