Ministri i Bujqësisë, Pylltarisë dhe Zhvillimit Rural, Armend Muja, ka pritur në takim ambasadorin e Francës në Kosovë, Olivier Guérot, me të cilin ka diskutuar për avancimin e bashkëpunimit në sektorin e bujqësisë.
Gjatë takimit, u shqyrtuan mundësitë për krijimin e marrëveshjeve të reja me kompani franceze, me fokus të veçantë në zhvillimin e bujqësisë dhe përmirësimin e sistemit të ujitjes në Kosovë.
Ministri Muja ka theksuar se rritja e sigurisë ushqimore mbetet një nga prioritetet kryesore të institucionit që ai drejton.
Nga ana e tij, ambasadori Guerot e ka vlerësuar lart këtë iniciativë dhe ka shprehu mbështetjen e tij për realizimin e saj.
Po ashtu, në takim u diskutua edhe për vizitën e ardhshme të ministrit Muja në Panairin Ndërkombëtar të Bujqësisë në Paris, e cila pritet të shërbejë si një mundësi për krijimin e lidhjeve të reja dhe forcimin e partneriteteve ekzistuese.
Në përfundim, ambasadori francez e ka uruar ministrin Muja për detyrën e re, duke i dëshiruar suksese në angazhimet e tij për zhvillimin e mëtejmë të sektorit të bujqësisë në Kosovë.
