Eksperti i sigurisë dhe shëndetit në punë, Naim Bajraktari, e ka vlerësuar si të duhur dhe të domosdoshëm vendimin e ministrit për Punë, Familje dhe Vlerat e Luftës Çlirimtare, Andin Hoti, për ndërmarrjen e një aksioni kombëtar të inspektimeve pas rasteve të vdekjeve të punëtorëve në vendin e punës, veçanërisht në sektorin e ndërtimtarisë.
Në emisionin “Ditari”, Bajraktari ka thënë se vendimi vjen në kohën e duhur për të rritur sigurinë në punë, megjithëse sipas tij është marrë me vonesë.
“Vendimi i ministrit është për t’u përshëndetur, sepse parashikon masa më të rrepta në kuadër të inspektoratit për parandalimin e rreziqeve në vendin e punës. Është një vendim shumë i qëlluar dhe i domosdoshëm për këtë kohë, edhe pse ka ardhur pas një fatkeqësie,” ka thënë Bajraktari.
Ai ka theksuar se zbatimi i plotë i këtij vendimi është thelbësor për të arritur rezultate konkrete në mbrojtjen e punëtorëve.
“Suksesi i këtij vendimi varet nga zbatimi i tij në përpikmëri. Nëse realizohet ashtu siç është paraparë, do të ketë ndikim të madh në rritjen e sigurisë dhe në parandalimin e aksidenteve,” është shprehur ai.
Bajraktari ka shtuar se, megjithëse masat mund të konsiderohen të vonuara, ato mbeten të rëndësishme dhe të nevojshme për të përmirësuar gjendjen aktuale në sektorin e ndërtimtarisë dhe më gjerë.
Ndryshe, Ministri për Punë, Familje dhe Vlerat e Luftës Çlirimtare, Andin Hoti, ka njoftuar se ka marrë vendim të menjëhershëm që në të gjithë territorin e Kosovës të fillojë një aksion i jashtëzakonshëm i inspektimeve, veçanërisht në sektorin e ndërtimtarisë.
Vendimi është marrë pasi të hënën vdiq një punëtor 59-vjeçar në Ferizaj.
Është vdekja e shtatë në vend të punës këtë vit.
“Kjo gjendje nuk mund të injorohet më. Kam marrë vendim të menjëhershëm dhe të qartë. Në të gjithë territorin e Kosovës do të fillojë aksion i jashtëzakonshëm i inspektimeve në sektorët me rrezikshmëri të lartë, veçanërisht në ndërtimtari. Çdo kompani që s’garanton kushte bazike të sigurisë, do të ketë ndalim të menjëhershëm të punimëve. Do të ndëshkohet sipas ligjit. E nuk do t’i lejohet të vazhdojë punën derisa t’i plotësojë standardet”, ka thënë Hoti nëpërmjet një video-adresimi të publikuar në Facebook.
Ai ka thënë se do të organizohen inspektime në dy ndërrime e po ashtu edhe me orare të zgjatura e edhe gjatë festave.
Sipas vendimit, ky aksion i inspektimeve do të zgjasë për 15 ditë.
