Në seancën solemne të Kuvendit të Kosovës, e organizuar për shënimin e Ditës Memoriale për të Mbijetuarit e Dhunës Seksuale të Luftës “Ma kthe dritën”, e mbijetuara Vasfije Krasniqi Goodman ka mbajtur një fjalim emocional, duke kërkuar respekt dhe dinjitet për të gjithë të mbijetuarit.
Ajo ka rikujtuar se data 14 prill 1999 është dita që ia ndryshoi jetën përgjithmonë, por ka theksuar se forca për të rrëfyer të vërtetën ka qenë më e madhe se dhimbja, në përpjekje për të kërkuar drejtësi.
“Sot qëndroj para jush si një e mbijetuar por si një zë që nuk zgjodhi heshtjen. 14 prilli është një datë që ndryshoi jetën time përgjithmonë, dhe pikërisht me këtë datë ky kuvend bëhet një vend ku dhimbja nuk fshehet por ndriçon. Një vend ku dhimbja nuk fshihet, por shndërrohet. Është një kujtesë, një thirrje dhe një shpresë”, ka deklaruar ajo para deputetëve dhe të pranishmëve.
Duke folur për simbolikën e kësaj dite, Krasniqi Goodman ka theksuar se qirinjtë e ndezur nuk janë vetëm një akt ceremonial, por përfaqësojnë jetët, kujtimet dhe forcën e të mbijetuarve për të vazhduar përpara.
“Qirinjtë që ndezim sot nuk përfaqësojnë vetëm një moment ceremonial, por përfaqësojnë jetën tonë, kujtimet tona dhe forcën tonë për të vazhduar përpara”, ka thënë Krasniqi-Goodman.
