Kreu i LDK-së, Lumir Abdixhiku, ka përkujtuar heroin e Kosovës, Agim Ramadani, duke e cilësuar si një figurë unike që bashkonte dimensione të rralla njerëzore dhe kombëtare.
Përmes një postimi në Facebook, Abdixhiku theksoi se te Ramadani ndërthureshin ndjeshmëria artistike dhe vendosmëria e luftëtarit, duke e përshkruar si një personalitet që e ndiente thellë jetën dhe e shihte lirinë si një vlerë që duhet jetësuar me çdo kusht.
Ai u shpreh se Ramadani nuk e zgjodhi luftën si rrugë të parë, por si një domosdoshmëri përballë mungesës së lirisë, duke theksuar se për një shpirt krijues, robëria përbën humbje të vetë kuptimit të jetës.
Abdixhiku përmendi edhe nofkën e tij “Katana”, duke thënë se ajo reflektonte karakterin e tij të prerë dhe të vendosur. Sipas tij, Ramadani nuk e shihte kufirin thjesht si një vijë për t’u kaluar, por si një pengesë që duhej shembur.
Abdixhiku tha se figura e Agim Ramadanit mbetet një frymëzim i përhershëm për lirinë dhe dinjitetin kombëtar.
