Më 10 prill të ’98 ishte nisur nga Drenasi për në Prishtinë.
Por mjekut të parë të Ushtrisë Çlirimtare të Kosovës Hafir Shala, rruga i ishte ndalur në gjysmë.
Ai ishte arrestuar nga policia serbe, e që atëherë, ende nuk dihet asgjë për fatin e tij.
Që nga zhdukja e tij, këtë të premtë shënohen 28 vjet.
Në këtë përvjetor, oborri i Qendrës së Mjekësisë Familjare në Drenas, u mbush plot.
Të pranishëm aty ishin familjarë e qytetarë të shumtë, të cilët bënë homazhe.
Për zbardhjen e fatit jo vetëm të Shalës, por edhe shumë të zhdukurve të tjerë, nga Komisioni Qeveritar për Persona të Zhdukur u zotuan se do të angazhohen.
“E kemi thënë gjithmonë dr. Hafir Shala, të zhdukurit me forcë dhe të gjithë të rënit në altarin e lirisë kanë lënë një amanet, dhe ajo është liria që po e gëzojmë sot. Është obligimi ynë si Komision qeveritar të ndriçojmë të vërtetën, të mësojmë fatin dhe vendndodhjen, dhe do të angazhohemi të mësojmë fatin”, tha Kushtrim Gara nga Komisioni Qeveritar për Persona të Zhdukur.
Për homazhe, i pranishëm ishte edhe kryetari i Drenasit.
“Unë doktor Hafir Shalën e kujtoj si njeri të urtë, si një njeri që ka vu përmbi kurrizin e tij gjithçka për lirinë e Kosovës dhe në shërbim të qytetarëve të Drenasit. Mbaj mend të gjitha peripecitë, përpjekjet, problemet që ka pas me pushtetin në faza të ndryshme. U dënua me shumë vite bashkë me vëllaun tem, ka këtu edhe bashkëvuajtës të tij”, tha i pari i Drenasit, Ramiz Lladrovci.
Lladrovci tutje kërkoi që institucionet të ngulin këmbë ma shumë në zbardhjen e fatit të të zhdukurve.
“Po shpresoj shumë që institucionet tona të ngulin këmbë ma shumë te institucionet ndërkombëtare dhe ato serbe që ta gjejmë trupin e tij dhe gjithë atyre që nuk janë në mesin tonë”, tha ai.
Më 17 korrik të 2025-tës, Gjykata Themelore në Prishtinë e ka dënuar me 15 vjet burgim Sllavisha Filiq, për rrëmbimin dhe zhdukjen e mjekut Shala gjatë luftës.
