Deputetja e PDK-së, Blerta Deliu, i ka bërë thirrje ushtrueses së detyrës së presidentes, Albulena Haxhiu, që të kompletojë përbërjen e Komisionit Qendror Zgjedhor në përputhje me Kushtetutën, duke garantuar një proces të paanshëm vendimmarrjeje.
Ajo deklaroi se, përveç shënimit të Ditës së Kushtetutës, është e rëndësishme të diskutohet edhe për përgjegjësinë e institucioneve që, sipas saj, nuk kanë respektuar aktin më të lartë juridik të vendit.
Deliu theksoi se tashmë ka përfunduar afati 60-ditor për kompletimin e KQZ-së, i cili, sipas saj, nuk është respektuar nga presidentja Vjosa Osmani. Ajo shtoi se përbërja aktuale e KQZ-së reflekton vetëm numrin e grupeve parlamentare, pa marrë parasysh numrin e deputetëve.
Ajo rikujtoi gjithashtu se Partisë Demokratike të Kosovës i takon edhe një anëtar në KQZ, gjë që, sipas saj, është konfirmuar edhe nga organizatat e shoqërisë civile.
“Kosova dje ka shënuar ditën e Kushtetutës, dhe krahas urimeve duhet të flasim për përgjegjësinë e munguar të institucioneve që ta respektojnë aktin themeltar të Kosovës.Dua të them që dje është përmbyllur afati 60 ditor të KQZ-së, afat që nuk është respektuar nga ish-presidentja Vjosa Osmani. Përbërja e Komisionit Qendror Zgjedhor e reflekton vetëm numrin e grupeve parlamentare pavarësisht numrin e deputetëve.PDK-së i takon anëtari i dytë në KQZ, këtë e kanë konfirmuar edhe organizatat e Shoqërisë Civile. PDK me këtë rast kërkon nga U.D e presidentes që ta kompletojë përbërjen e KQZ ashtu siç e parasheh Kushtetuta e Kosovës. Kërkojmë që të jetë e paanshme në vendimmarrje”, tha Deliu./teve1.info/
