Është përuruar objekti i ri i Administratës Tatimore të Kosovës (ATK) në Mitrovicë, në një ceremoni ku morën pjesë përfaqësues të institucioneve qendrore dhe lokale.
Kryeministri i Kosovës, Albin Kurti, tha se objekti i ri ofron kushte moderne pune dhe do të shërbejë për qytetarët e gjithë rajonit të Mitrovicës.
“Erdhëm edhe këtu që të përurojmë ndërtesën e re të Administratës Tatimore të Kosovës, ku në krahun tim të majtë është edhe drejtori udhëheqësi Mentor Hyseni. E pamë një objekt jashtëzakonisht të përshtatshëm për punë, gjithsej në tri nivele janë rreth një mijë metra katrorë prej tyre 750 metra katrorë janë të tillë që janë renovuar, ndërkaq 250 metra katror janë aneks, që janë bashkangjitur janë dikur rreth 30 zyre, 11 tualete, klimatizim, ngrohje, kushte moderne për punë dhe këtu tash do të shërbehen qytetarët, banorët e komunave të regjionit të Mitrovicës. Është një ditë e gëzuar për shtetin e Kosovës dhe për të gjithë qytetarët në veri e në jug, shqiptarë, serbë, boshnjakë, sepse Republika nuk bën dallime sipas etnisë përkundrazi kujdeset që t’i shërbej të gjithë qytetarëve sipas të drejtave të tyre dhe sipas nevojave të tyre që kanë. Prania e jonë këtu është dëshmi e përkushtimit tonë për mbledhjen e tatimeve dhe njëkohësisht për shërbimin e duhur e publik ndaj qytetarëve”, tha Kurti.
Drejtori i ATK-së, Mentor Hyseni, e cilësoi këtë investim si të rëndësishëm për bizneset në rajon.
“Është ngjarje e rëndësishme sidomos për qytetarët e Mitrovicës të cilët ushtrojnë veprimtari biznesore edhe në këtë pjesë që të marrin shërbime sikurse të gjithë bizneset që marrin në të gjithë Kosovën. Unë e kisha shfrytëzuar rastin që të falënderojë Ministrin e Punëve të Brendshme, Ministrin e Financave për këtë iniciativë dhe punë të shpejt që janë bërë jashtëzakonisht në kohë rekord dhe me cilësi të lartë siç e pamë brenda”, tha Hyseni.
Ndërsa, kryetari i Mitrovicës së Jugut, Faton Peci, tha se ky është një tjetër hap në përmirësimin e shërbimeve publike.
“Edhe kjo është njëra prej veprimeve të Qeverisë së Republikës së Kosovës në funksion të ofrimeve të shërbimeve për qytetarët, ndërsa kjo zyre përveç qytetit të Mitrovicës përfshin edhe në aspektin rajonal ku ne jemi këtu për të përuruar dhe mbështetur dhe duartrokitur veprimet e institucioneve të Kosovës në këtë rast ndaj qeveris”, tha Peci.
