Ambasada e Shteteve të Bashkuara të Amerikës në Kosovë ka kujtuar ditën historike kur misioni i saj në Prishtinë u transformua në Ambasadë zyrtare, më 8 prill 2008.
Në një postim në Facebook, Ambasada ka shpjeguar se ky hap erdhi pas njohjes së Kosovës si shtet i pavarur dhe vendosjes së marrëdhënieve diplomatike midis dy vendeve.
“Me Kosovën zyrtarisht si shtet të pavarur dhe me vendosjen e marrëdhënieve diplomatike, hapi tjetër ishte të pasqyrohej kjo marrëdhënie në praninë tonë diplomatike. Më 8 prill 2008, statusi i Misionit të SHBA-së në Prishtinë ndryshoi zyrtarisht nga Zyra e SHBA-së në Ambasadë të SHBA-së. Si rezultat, titulli zyrtar i misionit u bë Ambasada e SHBA-së në Prishtinë”, shkroi Ambasada.
Ky ndryshim ndodhi pak kohë pas shpalljes së pavarësisë së Kosovës dhe vendosjes së marrëdhënieve diplomatike më 18 shkurt 2008. Ambasada e përshkroi këtë moment si një hap të rëndësishëm në rrugëtimin drejt lirisë dhe forcimin e bashkëpunimit mes dy vendeve.
“Ky ndryshim erdhi pas vendosjes së marrëdhënieve diplomatike midis Shteteve të Bashkuara dhe Republikës së Kosovës më 18 shkurt 2008, një ditë pas shpalljes së pavarësisë së Kosovës më 17 shkurt 2008. #Freedom250 #AmericanExcellence #KosovoJourneyToFreedom”, shkroi Ambasada e SHBA-së./teve1.info/
