Ministri për Evropën dhe Punët e Jashtme i Shqipërisë, Ferit Hoxha, ka reaguar lidhur me kërkesën e studentëve shqiptarë në Maqedoninë e Veriut për zhvillimin e provimeve në gjuhën shqipe, duke e cilësuar atë si një kërkesë të drejtë dhe legjitime.
Në një postim në “X” Hoxha ka theksuar se përdorimi i gjuhës amtare është një e drejtë themelore e garantuar nga Kushtetuta e Maqedonisë së Veriut dhe nga Ligji për Përdorimin e Gjuhëve.
Sipas tij, kjo e drejtë nuk duhet të kufizohet apo të vonohet nga procedura administrative.
“Përdorimi i gjuhës amtare është një e drejtë themelore, e cila nuk mund dhe nuk duhet të ngushtohet apo vonohet nga asnjë procedurë,” ka deklaruar ai, duke shtuar se në rast se procedurat janë të paqarta apo të mangëta, institucionet kanë detyrimin të gjejnë zgjidhje të drejta dhe të qëndrueshme.
Hoxha ka apeluar që kjo çështje të trajtohet me maturi dhe përgjegjësi, duke shmangur çdo përpjekje për politizim.
Ai ka nënvizuar rëndësinë e respektimit të të drejtave themelore dhe trajtimit institucional të situatës.
“Demokracitë jo vetëm që kanë mekanizmat, por edhe pjekurinë e nevojshme për të gjetur zgjidhje ku harmonizohen shteti ligjor, legjislacioni dhe të drejtat e qytetarëve”, ka shtuar ai.
Hoxha gjithashtu ka vlerësuar angazhimin e studentëve, duke theksuar se mënyra demokratike me të cilën ata kanë paraqitur kërkesat e tyre meriton përgëzim.
“Studentët meritojnë përgëzim për angazhimin qytetar dhe mënyrën demokratike me të cilën kanë artikuluar kërkesën e tyre. Kjo kërkon një përgjigje me të njëjtin standard #përgjegjshmërie, përmes dialogut konstruktiv dhe zgjidhjeve që respektojnë plotësisht të drejtat e garantuara”, ka përfunduar Hoxha.
