Është rasati që së fundi e ka blerë.
Krejt kjo për të mbjellë perime të ndryshme në serrat e tij.
Por, bujku Avdullah Dushi nga Prishtina, tregon se çmimi po është i lartë.
E përfitimi për to, goxha i ulët.
“Farat te na nuk prodhohen. Ato që kanë qenë autoktone ma nuk ekzistojnë për shkak të jo kualitetit, jo konkurrenca është e madhe me hibride edhe na tash jemi në hibride, po kushtojnë shumë shtrenjtë. Për shembull, prej 50-60 euro nisin farat po mendoj, deri shkon 150 euro disa varietete që janë ma të favorizuara edhe kanë cilësi ma të lartë”, thotë Avdullah Dushi, bujk nga Prishtina.
Pos farave, Dushi tregon se as çmimi i plehut nuk është më i favorshëm.
“…Për shembull, kur i qitë 500 kile në hektar, na i qesim 200 kile, se është shumë shtrenjtë. Plehu është trefishi i produktit. Mandej nuk është rentabile me i qitë aq shumë pleh. Gruri, për shembull, sivjet ka qenë 18 cent, ndërsa plehu ka qenë 1 euro. Ajo nuk paguhet, nuk paguhet e deri ku shkon kështu, nuk i di ma mirë faktorët”, thotë ai për Tëvë1.
Shkak i çmimit të lartë të plehut, sipas Dushit, mbetet mungesa e fabrikave.
“Unë jam këtu koxha shumë vjet, prej ’58-ave jam, mbaj mend mirë. Kemi pasë dy fabrika të plehut: 3×15 që u kanë në Obiliq, edhe Kani u kanë në Mitrovicë. Këtu gati prej krejt Jugosllavisë janë furnizuar me plehra edhe Serbia, edhe Banati, edhe republikat e tjera, en a flas për Maqedoninë, edhe na mas andej. Sot nuk është asnjë, nuk ekzistojnë prej tyre”, shprehet Dushi.
Ndërkohë, kryetari i Federatës së Bujqve, Tahir Tahiri, thotë se problem për bujqit është edhe rritja e çmimit të naftës.
“Nuk ka rritje ku me dit qe sa te farat dhe plehrat. Nuk kanë shumë dallim nga viti i kaluar. Nuk ka ndryshime të mëdha në regjion, edhe në Evropë janë këto çmime. Te nafta është problemi kryesor sepse kjo ngritje e çmimeve po ndodh mu në kohën e mbjelljeve pranverore”, thotë ai.
Këto çmime të larta, sipas Tahirit, po rëndojnë shumë koston e prodhimtarisë bujqësore dhe si shkak i kësaj, në shumë raste bujqit nuk kanë leverdi të merren me prodhim.
