Deputetja e Aleancës për Ardhmërinë e Kosovës, Time Kadrijaj, ka kritikuar Qeverinë e Kosovës pasi propozimi i Partisë Demokratike të Kosovës për përfshirjen e një draft-rezolute për mbrojtjen e së vërtetës nuk u fut në rend dite si pikë e parë në Kuvendin e Kosovës.
Kadrijaj deklaroi se institucionet nuk po bëjnë mjaftueshëm për mbrojtjen e së vërtetës së luftës dhe për respektimin e viktimave.
Para deputetëve, ajo kërkoi që të tërhiqet libri i Shkëlzen Gashi, “Masakrat në Kosovë 1998-1999”, për të cilin tha se përmban të pavërteta.
“Muaji mars është i epopeve të rëndësishme të UÇK-së. Janë edhe përvjetorët e masakrave të kryera nga regjimi serb. Dje kryeministri Kurti ka qenë për masakrën në Lubeniq. A kemi të drejtë ne si shtet t’i fyejmë këto viktima? Nuk kemi. Ne po bëjmë padrejtësi dhe po më vjen keq se në çfarë deregje ka rënë kjo qeveri. Për një Rezolutë që nuk është politike, por për të mbrojtur vlerat e luftës, kemi këso kundërshtimesh se ku të vihet në rend dite, në fillim apo në fund. Historia nuk ndryshohet, nuk mund ta ndryshoni me këto linçime që po i bëni. Tërhiqeni edhe librin për masakrat në Kosovë të Shkëlzen Gashit, i cili ka shkruar të pavërteta, dhe është financuar nga Ministria e Jashtme, e që ai libër është shpërndarë nëpër vende të tjera. Pra, vetë shteti i Kosovës ka shpërndarë libra me të pavërteta, për të prezantuar një të pavërtetë, në vende të ndryshme të Evropës. Marre”, tha Kadrijaj nga foltorja e Kuvendit.
