Në seancën plenare të Kuvendit të Kosovës, shefja e Grupit Parlamentar të Lidhjes Demokratike të Kosovës, Jehona Lushaku-Sadriu, ka deklaruar se qytetarët janë mashtruar sa i përket llogaritjes së shpenzimit të energjisë elektrike.
Gjatë deklarimeve jashtë rendit të ditës, ajo theksoi se problemi është i përhapur dhe prek çdo familje në vend.
“Është padrejtësi që po ndodh prej muajsh apo vitesh. Qytetarët janë mashtruar. Kjo është e vërteta e hidhur. Ndërkohë që Qeveria u ka bërë thirrje qytetarëve të kursejnë energjinë dhe të shfrytëzojnë tarifën e natës, shumica e njehsorëve nuk e llogarisin saktë shpenzimin, duke sjellë fatura më të larta për çdo familje,” u shpreh ajo.
Lushaku-Sadriu theksoi se përgjegjësia bie mbi institucionet dhe operatorët përkatës, përfshirë Ministria e Industrisë, Ndërmarrësisë dhe Tregtisë, KEDS, ZRRE dhe KESCO, për shkak të mosveprimit dhe mungesës së mbrojtjes së konsumatorëve.
“Si është e mundur që një problem kaq i madh të mos jetë trajtuar me kohë? Qytetarët kanë paguar fatura të padrejta dhe askush nuk është thirrur në përgjegjësi. Përgjegjësia është e qartë dhe nuk mund të shmanget,” theksoi ajo.
Në fund, ajo kërkoi hetim të pavarur dhe auditim të plotë të sistemit të faturimit, kompensim për çdo shumë të marrë padrejtësisht, si dhe përfshirjen e prokurorisë për të shqyrtuar përgjegjësinë penale të mundshme.
