Deputeti i LDK-ë, Besian Mustafa në seancën parlamentare ka folur lidhur me rritjen e madhe të çmimeve të derivateve, ndërsa është paralajmëruar edhe një ngritje e mundshme e çmimit të energjisë elektrike.
Në fjalën e tij para deputetëve të Kuvendit, Mustafa kërkoi nga Qeveria që të ndërmarrë hapa të menjëhershëm për të stabilizuar situatën e krijuar.
“Kohëve të fundit të gjithë jemi dëshmitarë të rritjes enorme të çmimeve të derivateve, edhe një paralajmërim nga ana e ZRrE-së, që me gjasë do të kemi edhe një rritje të çmimit të energjisë që nga 1 maji. Këto rritje të çmimeve kanë një efekt zinxhiror, pra kur rritet çmimi i derivateve dhe rrymës, do të kemi rritje të çmimit të ushqimit, transportit, barnave, imputove bujqësore, veshmbathje, pra kemi efet zinxhiror të rritjes së çmimit të çdo produkti. Çdo familje në Kosovë duhet të numërojë centët, sepse fatkeqësisht nuk arrijnë të blejnë çdo gjë që iu nevojitet në çdo kohë. Pensionistët duhet t’i numërojnë centët, sepse nuk arrijnë të blejnë barnat. Vlen kjo edhe për studentët, për çdo qytetar”, shtoi Mustafa.
Ai theksoi se vendi nuk mund të ndikojë drejtpërdrejt në çmimet globale, por sipas tij, institucionet shtetërore kanë përgjegjësi që të ndihmojnë qytetarët për të përballuar situatën.
“Kërkojmë urgjentisht nga Qeveria të merr masa për të mbrojtur dhe përkrahur qytetarët, qoftë largim i përkohshëm i akcizës në derivate, largim ose ulje komplet e TVSH-së për një periudhe, përkrahje financiare për qytetarët, sidomos për familjet e cenuara”, tha ai./teve1.info/
