Familjarët u mblodhën të mërkurën.
Gjithçka ishte gati që homazhet të nisin në ora 12:00.
E gjitha kjo, në përvjetorin e 27-të të Masakrës së Lybeniqit në Pejë.
Këtu me 1 prill të vitit 1999, forcat serbe vranë dhe masakruan 59 civilë të pambrojtur shqiptarë.
Të parët që erdhën këtu për homazhe, ishin krerët e partive politike në vend.
Këta vendosën kurora lulesh tek memoriali i të vrarëve në këtë masakër.
Pas tyre, në Lybeniq erdhi edhe e para e vendit, Vjosa Osmani.
Kjo e fundit, tha se Serbia në këtë masakër pati vetëm një qëllim.
“Këtu u vranë e u masakruan edhe gratë shtatzëna, këtu u vranë edhe foshnjet në barkun e nënës e këtu u vranë edhe të moshuarit që nuk mund të lëviznin. Këtu u shpërfaq në mënyrë më mizore qëllimi i regjimit gjenocidal serb. Qëllimi ishte që ta shfaroste popullin shqiptar nga faqja e dheut”, tha presidentja Osmani.
E ata që i mbijetuan krimit serb, për presidenten patën një kërkesë në kohën kur vendi po përballet me krizat politike.
“Ne si familjarë kërkojmë që e gjithë politika të ketë unitet dhe Republika e Kosovës të jetë më fortë”, u shpreh Elahme Kurtaj-Haradinaj, dëshmitare.
Por, duket se kërkesa e kësaj të mbijetuare të masakrës, nuk u plotësua.
Kjo meqë në të njëjtën kohë, në Lybeniq arriti edhe kryeministri, Albin Kurti si dhe kryekuvendarja, Albulena Haxhiu.
Megjithatë, një përshendetje mes tyre mungoi.
Edhe Kurti, u njoftua nga afër me atë që ndodhi në atë ditë tmerri në Lybeniq.
Ndërsa kryeministri iu premtoi se amanetin e të vrarëve, do ta çojnë në vend.
Ndryshe, Masakra e Lybeniqit në Pejë u krye nga forcat serbe, të udhëhequra nga grupi “Çakejtë”, në krye me Nebojsha Miniq i njohur me nofkën “Mrtvi” (Mërtvi)
