Shiritat e sigurisë ende janë të vendosur.
E në vendngjarje u panë edhe ekskavatorët që intervenuan të dielën.
Kjo nuk ka ndodhur në rrugën “Don Shtjefën Kurti” në Prishtine.
Është kjo pamja që mbeti një ditë pas shembjes së rrugës “Don Shtjefën Kurti”, në Prishtinë.
Kjo bëri që një pjesë e kryeqytetit të dielën mbrëma të mbesin pa furnizim me ujë.
Problemi është zgjidhur rreth orës 12:00.
E në të njëjtën kohë, u zgjidh edhe problemi me energji elektrike.
“Pas një angazhimi intensiv dhe pune të pandërprerë në terren, është rikthyer furnizimi me energji elektrike në zonat e prekura përmes një zgjidhjeje të përkohshme, ndërkohë që ekipet tona po vazhdojnë angazhimin për garantimin e sigurisë së furnizimit për NS Prishtina 6. Dëmet e konsiderueshme nga shembja e dheut, e ndodhur dje në orët e pasdites në rrugën ‘Don Shtjefën Kurti’, kanë kërkuar masa sigurie. Në fazën fillestare, punimet kanë qenë të kufizuara dhe janë zhvilluar në mënyrë të kontrolluar, në përputhje me standardet dhe kërkesat përkatëse”, ka shkruar KOSTT.
Ndërkohë nga Komuna e Prishtinës bënë të ditur se për këtë rast janë pezulluar nga puna dy inspektorë.
“Janë pezulluar nga puna dy inspektorët e zonës ku ka ndodhur rasti, si dhe zyrtarin përgjegjës për lëndën. Punishtet ndërtimore duhet t’i nënshtrohen inspektimit të rreptë dhe të vazhdueshëm nga Inspektorati komunal, në mënyrë që të garantohet siguria e punëtorëve, qytetarëve dhe cilësia e punimeve sipas projektit të pranuar!”, kanë thënë nga Komuna e Prishtinës
Ky rast ka aktivizuar edhe Prokuroria Themelore në Prishtinë
“Prokuroria Themelore në Prishtinë përkatësisht Departamenti për Krime të Rënda- Njësiti për Hetimin e Krimeve Ekonomike dhe Korrupsion, njofton opinionin publik se më datë 30.03.2026, në kuadër të detyrës së tij zyrtare, ka inicuar një rast ndaj zyrtarëve përgjegjës të Komunës së Prishtinës, me qëllim të verifikimit nëse veprimet apo mosveprimet e tyre përbëjnë elemente të përgjegjësisë penale për kryerjen e veprës penale ‘’Keqpërdorim i pozitës apo autoritetit zyrtar’’, sipas nenit 414 të Kodit Penal të Republikës së Kosovës”, thuhet në njoftimin e Prokurorisë themelorë në Prishtinë.
Tëvël ka provuar të marr edhe mendimet e banorëve të kësaj lagjeje.
Por të njëjtit, nuk kanë pranuar të flasin para kamerave.
E të hënën, Kryetari i Prishtinës, Përparim Rama, ka paralajmëruar masa të rrepta ndaj vendpunishteve ndërtimore në kryeqytet, pas shqetësimeve për sigurinë në terren.
