Një incident ka ndodhur të dielën pasdite në Prishtinë, ku rreth orës 15:00 një pjesë e rrugës “Malush Kosova” është shembur, duke penguar ndjeshëm lëvizjen e qytetarëve në atë zonë.
Sipas njoftimit 24-orësh të Policisë së Kosovës, rasti është trajtuar si “shkaktim i rrezikut të përgjithshëm”, për shkak të pasojave që ka sjellë në sigurinë dhe qarkullimin publik.
Autoritetet bëjnë të ditur se një person është intervistuar në cilësinë e të dyshuarit lidhur me këtë rast. Pas intervistimit, me vendim të prokurorit, ai është liruar dhe rasti do të vazhdojë të trajtohet në procedurë të rregullt.
Shembja e dheut ka bërë që rruga të bëhet e pakalueshme përkohësisht.
“Është raportuar për shembje të dheut, ku si pasojë rruga është bërë e pakalueshme. Lidhur me rastin në cilësinë e të dyshuarit është intervistuar i dyshuari mashkull kosovar dhe me vendim të prokurorit është liruar në procedurë të rregullt”, thuhet në raport. /teve1.info/
