Deputeti i Lëvizjes Vetëvendosje, Enver Dugolli ka thënë se të dhënat për maskuarën në Burgun e Dubravës të paraqitura në ekspozitën në sheshin e Prishtinës janë të pasakta.
Ai ka thënë se përveç numrit të viktimave ka edhe pasaktësi të tjera për këtë masakër.
Të dhënat e paraqitura për këtë masakër janë krejtësisht të pasakta. Përveç numrit të viktimave, i cili nuk korrespondon me të vërtetën (ku figurojnë 106 të vrarë, ndërsa deri më tani janë të konfirmuar 116 të masakruar dhe 1 i zhdukur) aty paraqitet edhe një pasaktësi tjetër e madhe dhe e dëmshme.Nuk e di nëse kjo është bërë me qëllim apo jo, por pretendimi se 48 prej të vrarëve kanë qenë persona të armatosur shqiptarë, ndërsa 58 civilë, është plotësisht i pavërtetë. Në atë masakër gjenocidale nuk ka pasur asnjë shqiptar të vrarë në cilësinë e personit të armatosur. Të gjithë kemi qenë duarthatë dhe të pambrojtur”, ka shkruar Dugolli në një reagim në Facebook i cili është njëri nga të mbijetuarit e masakrës në Burgun e Dubravës.
Ai u ka bërë thirrje organizatorëve që të përmirësojë këto të dhëna.
“Duke marrë parasysh dëmin që i shkaktohet të vërtetës dhe dëshmisë historike, ftoj urgjentisht organizatorët e kësaj ekspozite ta tërheqin këtë material për Dubravën dhe ta korrigjojnë atë.Një material i tillë, në formën aktuale, nuk i shërben të vërtetës; përkundrazi, mund të përdoret për të përforcuar narrativën e rreme të Serbisë për gjoja rebelimin e të burgosurve shqiptarë gjatë kohës kur është kryer kjo masakër. Gjithashtu, ftoj Prokurorinë e Shtetit, përkatësisht departamentin për krime lufte, që të përfshihet në këtë çështje dhe ta hetojë këtë rast”, ka shkruar Dugolli.
Të enjten në sheshin e Prishtinës është hapur ekspozita për masakrat e kryera nga regjimi i Serbisë në vitin 1998-1999.
Në këtë ekspozitë janë paraqitur, në mënyrë kronologjike, 49 masakra të kryera gjatë luftës në Kosovë, duke filluar nga masakra në Likoshan-Qirez (28 shkurt 1998) e deri te masakra në Familjen Bala (12 qershor 1999)./teve1.info/
