Ushtria e Iranit do të vazhdojë përgjigjen e saj ndaj luftës së nisur nga SHBA-të dhe Izraeli derisa regjimi të ketë arritur “fitore të plotë”, ka thënë komandanti i forcave të armatosura të vendit, në një deklaratë të lëshuar nëpërmjet mediave shtetërore.
Gjenerali major Ali Abdollahi Aliabadi nuk dha hollësi se çfarë do të konsideronte Irani si “fitore të plotë”.
Megjithatë, ai i talli Shtetet e Bashkuara si një komb “të zbrazët” që është “shembur para botës”, me Donald Trumpin që “përpiqet të shpëtojë nga lufta” që filloi vetë.
“Presidenti amerikan, Trump, pasi e kuptoi situatën dhe u ngec në luftë , ka humbur shpresën për qëllimet e tij dhe tani po kërkon ndihmë nga vendet e tjera për të dalë prej saj, gjë që është një moment historik dhe një nder i madh për popullin iranian”, tha Aliabadi, sipas citimit të Guardian.
“Në këtë kohë të ndjeshme, forcat e armatosura të Iranit i qëndrojnë besnike premtimit të tyre, ndjekin plotësisht udhëheqësin suprem dhe komandantin e përgjithshëm Mojtaba Khamenei dhe do të vazhdojnë këtë rrugë krenare me mbështetjen e popullit deri në fitoren e plotë”, shtoi ai./teve1.info/
