Me 49 raste pozitive me COVID-19 në 24 orët e fundit, të shtunën në vend është shënuar numri më i madh i të infektuarve që nga 18 marsi.
E lidhur me këtë, së fundi i shqetësuar është shprehur edhe i pari i Ministrisë së Shëndetësisë, Rifat Latifi, derisa ka paralajmëruar edhe masa të reja.
Ndonëse ky i fundit tha se së shpejti do të mblidhet komiteti për rivlerësimin e gjendjes epidemiologjike, nga Ministria e Shëndetësisë nuk treguan se kur do të ndodhë një gjë e tillë.
“Mekanizmat anti COVID-19 përfshirë komitetin për koordinim dhe vlerësim të situatës kundër COVID-19 dhe Komiteti këshillues i ekspertëve kundër COVID-19 përcjellin rregullisht situatën dhe këta mekanizma, do të bëjnë rekomandimet e tyre, nëse do të ketë nevojë për ndonjë masë të re, përveç atyre që janë në fuqi me masat e fundit të ndërmarra më 30 prill”, thonë nga Ministria e Shëndetësisë.
Nga komuniteti i gastronomëve thonë se nuk janë ftuar për të diskutuar për masa të reja, ndërsa kufizimin e veprimtarisë së tyre në këtë kohë e shohin tërësisht të panevojshëm.
“S’po dojmë as me mendu atë pikë. Nuk po dojmë as me mendu se secili sen na dëmton. Qeta jena t’u e prit, për m’u këndell, së paku për me i la borxhet të cilat i kena kriju gjatë e mas pandemisë kështu që s’po dojna as me mendu atë pikë”, thotë Petrit Kllokoqi, kryetar i Shoqatës së Gastronomëve.
Masat kufizuese në ekonomi në këtë periudhë nuk i sheh si të nevojshme as profesori i ekonomisë, Mustafë Kadriaj.
“Kjo është një qasje jashtëzakonisht e gabuar në këtë kohë kur pritet tash me pas një rritje të zhvillimit ekonomik, të aktivitetit ekonomik, po ashtu edhe diaspora. Në fakt këtë duhet ta shfrytëzojmë si Kosovë si një lloj shtytje, një lloj infuzioni ekonomik për ekonominë e vendit. Nëse edhe në këtë kohë bëhet një bllokadë kësisoj, besoj që ky do të jetë një kolaps për ekonominë”, thotë Kadriaj.
Shumë shpejt në Kosovë pritet të jepet edhe doza e katërt e vaksinës anti-COVID teksa prioritet për të do të kenë kategoritë e rrezikuara që tashmë i kanë marrë tre doza.
Kronika e realizuar nga gazetari Gojart Jashari.
