Shkruan: Islam Lauka
Sot u botua në shtyp fjalimi i plotë i KM Rama, i mbajtur pardje në Samitin e BE-së, në Bruksel.
Veç të tjerash, në të kishte një paragraf për Kosovën, ku me plot të drejtë, i kërkohet Bashkimit Evropian që t’i hap rrugë liberalizimit të shumëpritur të vizave për qytetarët kosovarë.
Dhe bëri shumë mirë që e ringriti këtë çështje në Bruksel.
Por më poshtë, kishte jo një, por plot katër paragrafe, kushtuar Serbisë. Pasi vë në dukje rolin qendror të Serbisë në Ballkan dhe përkushtimin e saj në projektin evropian (teza të propagandës së Vuçiqit), Rama me mendjelehtësinë tipike të tij, iu kërkon udhëheqësve të BE-së, pikërisht atë që dëshiron Moska – të mos i bëjnë presion Beogradit për vendosjen e sanksioneve ndaj Rusisë.
Para pak ditësh, Rama u shfaq me plisin shqiptar në Drenicë dhe me poza patriotike në Prishtinë. Në Bruksel, kameleoni ynë u shfaq me oglavja-n serbe dhe me poza prosllave e proputiniste.
Duket se edhe paragrafi i vetëm për Kosovën u fut në fjalimin e tij për të shitur katër të tjerët për Serbinë.
Kizingeri ka shkruar se mendjelehtësia e politikanëve është një luks për të cilin paguhet shtrenjtë. Problemi është se faturat i shkojnë jo Ramës, por Kosovës dhe kombit shqiptar.
