Komisioni i Gjyqtarëve ka reaguar ndaj komunikimit të trajnerit të KF Llapit, Tahir Batatina, me gjyqtarin anësor Fatlum Berisha, duke e cilësuar atë si të papranueshëm dhe jashtë çdo norme etike e profesionale. Reagimi vjen pas publikimit të një bisede nga vetë Berisha, e cila ka nxitur reagime të shumta në opinionin sportiv.
Në njoftimin zyrtar, Komisioni shprehet se “gjuha e përdorur në këtë rast është e papranueshme dhe i tejkalon normat etike, profesionale dhe njerëzore”, duke theksuar se shqetësues mbetet veçanërisht përfshirja e çështjeve personale dhe familjare në komunikim. Sipas tyre, këto referenca “tejkalojnë çdo kufi të komunikimit”.
Komisioni i Gjyqtarëve i ka dhënë mbështetje të plotë gjyqtarit Fatlum Berisha, duke vlerësuar “profesionalizmin, integritetin dhe përkushtimin e tij në ushtrimin e detyrës”. Po ashtu, është theksuar se çdo përpjekje për të cenuar dinjitetin e gjyqtarëve apo për t’i vënë ata nën presion përmes gjuhës së papërshtatshme është e papranueshme dhe nuk duhet të tolerohet.
Në reagim dënohen fuqishëm të gjitha format e presionit, ofendimit apo kërcënimit ndaj gjyqtarëve.
“Integriteti i gjyqtarëve është themel i funksionimit të drejtë të garave dhe si i tillë duhet të mbrohet pa kompromis”, thuhet më tej në komunikatë.
Nga ana tjetër, publikimi i bërë nga vetë Berisha ka nxitur reagimin fillestar. Ai ka ndarë një mesazh të ashpër ndaj trajnerit të Llapit, duke shkruar: “Mua është e vërtetë që më ka sprovuar Zoti, por ty që përdor tragjedi familjare, kurrë hallall Zoti mos ta bëftë”. Ai ka kërkuar gjithashtu reagim institucional nga FFK dhe organet kompetente.
Komisioni i Gjyqtarëve u ka bërë thirrje të gjithë akterëve të futbollit që të ruajnë respektin dhe profesionalizmin, duke shtuar se do të vazhdojë të qëndrojë në mbrojtje të gjyqtarëve dhe në funksion të forcimit të integritetit të garave.
Batatina përmes një reagimi ka mohuar se ka përmendur familje duke thënë se Berisha po “viktimizohet”.
“Unë nuk kam përmendur familjen dhe kjo çështje nuk ka të bëjë me familjen, por me gabime të qëllimshme që po na bëhen nga i njëjti person në dy ndeshje radhazi. Asnjëherë nuk e kam menduar se çfarë synon të arrijë duke u viktimizuar Fatlum Berisha. Megjithatë, nëse këto janë gabime të qëllimshme, i qëndroj deklaratës sime dhe besoj se çdo padrejtësi duhet të marrë ndëshkimin e merituar profesional – por asnjëherë me konutacionin e dhënë. Nuk është e drejtë të humbet mundi dhe djersa e një klubi, e një qyteti, si dhe e lojtarëve dhe stafit që punojnë gjatë gjithë javës për të përgatitur një ndeshje futbolli”.
