Gjyqi ndaj tre të akuzuarve për sulmin në Banjskë po i afrohet fundit.
Tanimë gjykimi ka arritur në fazën e dhënies së mbrojtjes nga të akuzuarit.
Në seancën e mbajtur këtë të mërkurë, i vetmi që u deklarua e nuk u mbrojt në heshtje ishte Dushan Maksimoviq.
Ai mohoi përfshirjen në sulmin terrorist në Banjskë, 23 shtatorin e vitit 2023.
“Në pyetjen e prokurorisë speciale që ta sqaroj se nga e kam marrë atë uniformë, nga kush kam qenë i angazhuar me detyrë dhe cfarë detyre kam pasë, unë këtë e kam treguar, mirëpo kur e kam shikuar proces verbalin e kam vërejtur se mungon pjesa e përgjigjes, pikërisht në këtë pyetje e cila ka të bëjë me angazhimin tim dhe detyrat e mi. Unë nuk kam qenë i angazhuar nga askush dhe nuk kam bërë asgjë”, tha i akuzuari Maksimoviq.
Maksimoviq, tregoi se nga e kishte marrë uniformën ushtarake.
“Në facebook në grupe publike që janë marrë me shitje të uniformave mund të shihet se i kam kontaktuar se ku ta blej. Mua kjo uniformë me është bërë dhuratë. Kam dashur që ta blej, por shoku im qe mirret me pejnboll e ka pasur këtë uniformë dhe nuk m’i mori paratë, por ma dhuroi”, tha ai.
Me këtë uniformë, prokuroria posedon një fotografi e cila pretendohet se është bërë në kohën e sulmit në Banjskë.
Por kjo, u mohua nga i akuzuari Maksimoviq.
“Fotografia është realizuar thjeshtë për argëtim, siç i provon cdo kush veshjet e reja që i blen. Kjo foto është bërë 285 ditë para sulmit në Banjskë, pra në vitin 2022. Sipas prokurorisë, i bie që cdo kush që ka pasur një uniformë tradicionale serb, kapele apo pjesë tjera të uniformës, është i përfshirë në sulmin në Banjskë”, u shpreh ai.
Në pyetjet e avokates së tij, Maksimoviq tregoi se ku kishte qenë në kohën kur ndodhi sulmi në Banjskë.
“Më 23 shtator, pas kryerjes së punës në Ranjska Banja, bashkë më disa shokë kemi shkuar në një vikendicë. Aty shkojmë fundjavën e fundit ose të parafundit të cdo muaji. Kjo vikendicë është gati 4 km larg Banjskës”, tha Maksimoviq.
Në seancat e radhës që do të mbahen në muajin prill, palët do të thonë fjalët e tyre të fundit.
