Ai po dyshohet se është keqtrajtuar nga prindërit dhe është në gjendje të rëndë shëndetësore.
Fëmija nga Lipjani i cili është pranuar në QKUK pas dyshimit se u keqtrajtua nga prindërit e tij, është duke u trajtuar në Klinikën e Pediatrisë – Repartin e Kujdesit Intensiv Pediatrik
Sipas QKUK-së, fëmija ishte pranuar në gjendje të rëndë shëndetësore dhe ekziston dyshimi për kequshqyerje.
Ai po ashtu sipas ShSKUK-së kishte edhe plagë të rënda në shputat e këmbëve.
“Menjëherë pas pranimit në Emergjencën Qendrore janë realizuar konsultat nga kirurgu plastik dhe pediatri, të cilët kanë rekomanduar hospitalizimin urgjent në Klinikën e Pediatrisë – Repartin e Kujdesit Intensiv Pediatrik, për trajtim dhe monitorim të mëtejmë, thuhet në komunikatë.
Poshtu se ShSKUK-së nga dyshimet për keqtrajtim të mundshëm të fëmijës, janë njoftuar organet kompetente, përfshirë Policinë dhe shërbimet sociale, në përputhje me procedurat dhe detyrimet ligjore për mbrojtjen e fëmijëve. Pas pranimit në Kujdesin Intensiv Pediatrik, fëmija i është nënshtruar ekzaminimeve të plota laboratorike dhe imazherike.
“Trajtimi intensiv i plagëve është duke vazhduar, ndërkohë që janë realizuar edhe konsultat multidisiplinare me kirurgun vaskular, kirurgun plastik dhe ortopedin. Për shkak të gjendjes së rënduar psikologjike, në procesin e trajtimit janë përfshirë edhe psikologu, psikiatri i fëmijëve dhe punëtori social, me qëllim të vlerësimit dhe ofrimit të mbështetjes së nevojshme psikosociale. Aktualisht, fëmija ndodhet pa përcjellje nga prindërit apo kujdestari ligjor dhe është nën mbikëqyrjen e vazhdueshme të stafit mjekësor dhe punëtorëve socialë, në përputhje me procedurat për mbrojtjen dhe kujdesin ndaj fëmijëve në situata të tilla”, thuhet tutje nga ShSKUK.
Policia ka njoftuar se ka arrestuar dy prindërit e 5-vjeçarit.
Arrestohet çifti në Lipjan për moskujdesje ndaj djalit të tyre
