Presidentja e Vjosa Osmani ka përkujtuar sot masakrën në Tregu i Gjelbër, ku më 13 mars 1999, nga granatat e forcave të regjimit serb, u vranë mizorisht shtatë civilë të pafajshëm, nga mosha 5 deri në 65 vjeç.
Në përkujtim të viktimave, Osmani ka theksuar rëndësinë e kësaj date për Mitrovicën dhe për kujtesën kombëtare:
“Në këtë ditë përkujtojmë viktimat e masakrës në Tregun e Gjelbër në Mitrovicë, ku më 13 mars 1999, nga granatat e forcave të regjimit gjenocidal serb, u vranë mizorisht 7 civilë të pafajshëm, nga mosha vetëm 5 deri në 65 vjeç. Në këtë akt makabër u plagosën 128 qytetarë të tjerë: fëmijë, gra, pleq e të rinj, të cilët u përballën me barbarinë e një regjimi kriminal”, ka deklaruar Osmani.
Presidentja ka shtuar se masakra mbetet një dëshmi e dhimbshme e krimeve mizore të kryera gjatë luftës në Kosovë.
“Masakra e Tregut të Gjelbër mbetet dëshmi e dhimbshme e krimeve mizore të kryera gjatë luftës në Kosovë. Përulemi me respekt para viktimave, ndajmë dhimbjen me familjet e tyre dhe riafirmojmë thirrjen për drejtësi”, thuhet në njoftimin e Presidencës.
