Dy persona nga Prishtina janë arrestuar nga Policia Kufitare e Shqipërisë në pikën kufitare të Morinës, nën dyshimin për trafikim të armëve të zjarrit dhe mjeteve motorike.
Arrestimet u realizuan në kuadër të operacionit policor të koduar “JAD 1”, i zhvilluar nga shërbimet e Policisë Kufitare pas verifikimeve dhe kontrolleve të detajuara në hyrje dhe dalje të territorit shqiptar.
Sipas policisë, fillimisht u arrestua në flagrancë shtetasi M.P., 38 vjeç, banues në Prishtinë, i cili tentoi të trafikonte në Shqipëri një armë zjarri të fshehur në një automjet të tipit “BMW”, që rezultoi i vjedhur në Gjermani.
“Në hyrje të Republikës së Shqipërisë është paraqitur shtetasi M.P., i cili drejtonte një automjet tip ‘Tuareg’, me të cilin kishte rimorkuar një automjet tip ‘BMW’. Nga verifikimet rezultoi se automjeti ‘BMW’ ishte i vjedhur në Gjermani”, thuhet në njoftimin e policisë.
Gjatë kontrollit të detajuar në automjetin e rimorkuar, policia gjeti dhe sekuestroi një armë zjarri pistoletë me municion luftarak.
Në vijim të hetimeve dhe veprimeve operacionale, autoritetet arritën të identifikojnë dhe arrestojnë edhe një person tjetër, H.A., 34 vjeç, gjithashtu banues në Prishtinë, i cili dyshohet se kishte porositur trafikimin e armës dhe automjetit.
“Si rezultat i hetimeve të thelluara është mundësuar identifikimi dhe arrestimi i shtetasit për llogari të të cilit ishin kryer këto veprimtari kriminale”, thuhet më tej në njoftimin e policisë.
Gjatë operacionit janë sekuestruar arma e zjarrit (pistoletë) me municion luftarak, automjeti tip “BMW”, si dhe automjeti tip “Tuareg” me rimorkio me të cilin transportohej vetura.
Materialet procedurale i janë referuar Prokurorisë së Kukësit për veprime të mëtejshme.
