Përmes një postimi në Facebook, Abbott ka thënë se miratimi i Udhërrëfyesit për Zbatimin e Marrëveshjeve të Energjisë nga Kosova dhe Serbia është një hap i mirëpritur.
Ai thotë se pret me padurim vazhdimin e zbatimit të shpejtë dhe përparimin e mëtejshëm në dialog.
“Shumë i kënaqur të dëgjoj se bordi i ERO-së tani ka lëshuar licencë për Elektrosever për të operuar në katër komunat veriore të Kosovës. Miratimi i Udhërrëfyesit për Zbatimin e Marrëveshjeve të Energjisë nga Kosova dhe Serbia ishte një hap i mirëpritur përpara dhe një shembull i mirë se çfarë mund të bëhet me angazhim fleksibël dhe konstruktiv. Pres me padurim vazhdimin e zbatimit të shpejtë dhe përparimin e mëtejshëm në Dialogun e lehtësuar nga BE”, ka shkruar ai.
Sot Bordi i Zyrës së Rregullatorit për Energji (ZRRE) i ka aprovuar licensën “Elektroseverit” për furnizim me energji elektrike të katër komunave veriore.
Kjo licensë është aprovuar me pesë vota për dhe asnjë kundër.
Kryesuesi i ZRRE-së, Ymer Fejzullahu, tha se ky proces ka qenë i stërzgjatur.
“Territori që mbulon kjo licensë është e konsumatorëve të Zveçanit, Zubin Potokut, Leposaviqit dhe Mitrovicës Veriore, ky proces ka qenë i stërzgjatur. Duhet të ritheksohet se kjo licensë ka të bëjë me furnizimin në 4 komunat me çmime të parregulluara, që do të thotë se konsumatorët e këtyre komunave do të furnizohen me çmime, të cilat ofrohen nga ky furnizues, por duhet të ritheksohet se tarifat do të jenë obligative dhe do të implementohen në gjithë territorin e Republikës së Kosovës”, është shprehur ai. /teve1.info/
