Komiteti i Rajoneve i Bashkimit Evropian (CoR) ka vendosur që në dokumentet dhe komunikimet e tij publike të mos përdoret më emërtimi “Kosovë*”, por vetëm “Kosovë”.
Sipas njoftimit të Asociacionit të Komunave të Kosovës (AKK), ky vendim është përfshirë në opinionin më të fundit të CoR mbi Paketën e Zgjerimit të BE-së 2025 për Ballkanin Perëndimor dhe Turqinë.
Me këtë vendim, Komiteti i Rajoneve harmonizon praktikën e tij me qëndrimin e kahershëm të Parlamentit Evropian, i cili tashmë përdor emërtimin “Kosovë” pa asteriks në dokumentet e tij zyrtare.
Në të njëjtin opinion, Komiteti i Rajoneve ka bërë thirrje edhe për heqjen e masave të Bashkimit Evropian ndaj Kosovës, duke theksuar se këto masa kanë ndikuar drejtpërdrejt te komunat dhe qytetarët e vendit.
Sipas dokumentit, organizimi i zgjedhjeve lokale në Kosovë gjatë vitit 2025 është vlerësuar si i suksesshëm, ndërsa pjesëmarrja e të gjitha komuniteteve është konsideruar si faktor që ka forcuar legjitimitetin e institucioneve komunale dhe funksionimin e demokracisë lokale.
Në opinion theksohet se, me rikthimin e pjesëmarrjes demokratike në nivel lokal, arsyet fillestare për vendosjen e masave të BE-së ndaj Kosovës nuk qëndrojnë më, prandaj Komisioni Evropian ftohet që t’i heqë ato sa më parë.
Asociacioni i Komunave të Kosovës ka theksuar se ka luajtur rol aktiv në promovimin e rolit të pushtetit lokal në proceset evropiane dhe në ngritjen e çështjeve që lidhen me komunat e Kosovës në institucionet e Bashkimit Evropian.
Përmes bashkëpunimit me Komitetin e Rajoneve, rrjetet evropiane të qeverisjes lokale dhe partnerët ndërkombëtarë, AKK ka kontribuar në promovimin e rolit të komunave në procesin e integrimit evropian të Kosovës dhe në informimin e partnerëve evropianë për ndikimin që masat e BE-së kanë pasur te qytetarët.
Drejtori ekzekutiv i AKK-së, Sazan Ibrahimi, e ka vlerësuar këtë zhvillim si një lajm të rëndësishëm për Kosovën.
“Ky është një lajm shumë i mirë për Kosovën dhe për komunat tona. Është shumë inkurajuese që institucionet evropiane po e njohin rolin e pushtetit lokal dhe ndikimin që vendimet e tyre kanë në jetën e qytetarëve në nivel lokal”, ka deklaruar Ibrahimi.
Ai ka theksuar se rekomandimi për përdorimin e emrit “Kosovë” pa asteriks përbën një zhvillim të rëndësishëm në trajtimin institucional të Kosovës në nivel evropian.
Sipas tij, Asociacioni i Komunave të Kosovës do të vazhdojë të angazhohet për forcimin e rolit të komunave në procesin e integrimit evropian dhe për përfaqësimin e interesave të pushtetit lokal në institucionet evropiane.
