Të dyja fjalët, sipas Osmanit, nuk janë në propozimin francez si zgjidhje përfundimtare, por janë vendosur (disa prej tyre në kllapa) si çështje për të cilat nuk mund të arrihet marrëveshje për shkak të qëndrimit të Republikës së Bullgarisë.
Pala bullgare kanë insistuar që para se të nisin bisedimet mes Maqedonisë së Veriut dhe BE-së të miratohet një protokoll në bazë të të cilit, Shkupi obligohet që të ndryshojë fillimisht Kushtetutën për përfshirjen e pakicës bullgare në të, por edhe të mos ndryshojë pozicioni i saj për gjuhën maqedonase, e cila nuk njihet nga Sofja dhe aspektet historike, respektivisht personalitetet nga e kaluar dhe librat shkollorë, që duhet të marrin pëlqimin e palës bullgare para se të futen në përdorim.
Një “protokoll i tillë për Maqedoninë e Veriut është i papranueshëm, pasi do të nënkuptonte “rrënim të identitetit kombëtar”.
Parlamentit i Bullgarisë ndërkohë është duke debatuar të premten për miratimin e propozimit francez, i cili në formën siç është paraqitur, sipas ministrit të Punëve të Jashtme të Maqedonisë së Veriut, Bujar Osmani, “do të bllokojë procesin evropian në planin afatgjatë dhe do të paralizojë edhe instrumentet e marrëveshjes së fqinjësisë së mirë”.
“Presidenca franceze u tregua shumë e kujdesshme në formulimin e tekstit, duke i kushtuar vëmendje ndjeshmërisë së të dyja palëve, ndaj dhe pyetjet që nuk ishin të pranueshme për ne, i vendosi si propozime të papërcaktuara (në kllapa) për të theksuar se janë çështje të pazgjidhura. Prandaj, ne mund vetëm të falënderojmë Presidencën franceze, por ne duhet ta refuzojmë propozimin e tyre në këtë formë, pikërisht për shkak të pjesëve në të, për të cilat pala bullgare nuk tregoi mirëkuptim pa asnjë argument”, ka shkruar Osmani në rrjetin social Facebook.
Por, VMRO DPMNE-ja opozitare të premten ka fajësuar pikërisht shefin e diplomacisë, Bujar Osmani, dhe kryeministrin Dimitar Kovaçevski për “debakël në politikën e jashtme”.
“Kryeministri Dimitar Kovaçevski dhe ministri Bujar Osmani janë dy aktorët që patën debaklin më të madh diplomatik, pas atij me Deklaratën e Lisbonës. Maqedonia mori një propozim joparimor dhe poshtërues për kornizën negociuese, plot çështje të imponuara bilaterale. Është fakt se Kovaçevski dhe Osmani kanë marrë pjesë aktive në formësimin e këtij dokumenti, ndonëse e kanë fshehur nga opinioni. Prandaj, nuk ka nevojë për dy fjalë dhe as nuk ka nevojë për arsyetim me kllapa. Mjafton një fjalë. Dorëheqje!”, ka shkruar në rrjetin social Facebook, Antonio Miloshovski, deputet i VMRO-DPMNE-së dhe kryetar i Komisionit parlamentar për politikë të jashtme./rel/
