Është fshati Syriganë në Komunën e Skenderajt.
E mëngjesin e së dielës, këtu zbarkuan Policia e Kosovës.
Cak i tyre ishin pesë shtëpi të qytetarëve të komunitetit serb.
Kjo bëri, që nën pranga të përfundojnë Goran Tomaseviq, Sinisha Tomaseviq, Predrag Tomaseviq dhe Nebojsha Tomaseviq.
Të gjithë këta, po dyshohen për vrasjen e gjashtë civilëve shqiptarë të këtij fshatit, gjatë kohës së luftës.
E emrat e tyre, janë të njohur për banorët e Syriganës.
“I njoh si persona; në kohë lufte kanë qenë të gjithë të rinj, sigurisht të armatosur. Pa dyshim se i ka kapur mosha tani. Të gjithë kishin shërbim ushtarak të kryer në ish-Jugosllavi. Këta na kanë mbajtur në rreth natën kritike të 7 qershorit ’98”, thotë Safet Uka-banor i fshatit.
Por, çfarë ndodhi atë ditë të rëndë qershori në këtë fshat?
“Më 7 qershor ’98, rreth orës 20:00 në mbrëmje, na kanë rrethuar këtu bashkëvendësit. Të nesërmen, më 8 qershor, rreth orës 03:00–03:15, ka hyrë këmbësoria nga fshati Cerkolet, i cili nga këtu në vijë ajrore është 1–1.5 kilometra, e udhëhequr nga Miomer Pandoviqi, kryesori i njësisë speciale të komunës së Istogut”, tregon Uka.
E forcave serbe, pati fatin t’i shpëtonte edhe Rifat Demiri.
Ky kujton momentin kur personat e maskuar, e dërguan për pushkatim.
“Dy ditë para se të na dëbonin, ishim në Rumnik për të blerë disa gjëra, sepse nuk kishte markete. Kur u kthyem, isha i gjashti; tre veta me maska na ndaluan në Banjë. Tre i liruan, ndërsa tre na çuan për të na pushkatuar..”, rrëfen ai.
Por, këtë fat nuk e kishte i afërmi i tij, Samir Demiri.
“Këtu na i kanë vrarë 8 menjëherë, dhe kur kemi mbërritur në Leqinë kemi parë me dylbi të UÇK-së se këtu vetëm i digjnin shtëpitë. Erdhi njëri dhe tha: ‘I kam mbuluar me batanije tetë veta që i kishin vrarë.’ Edhe katër të tjerë i kanë vrarë më vonë, ndërsa një nuk e kemi gjetur kurrë- Samir Demirin”, thotë Rifat Demiri-banor i Syriganës.
E nën prangat e policisë të dielën në të njëjtin aksion, përfundoi edhe Ratko Krakoviq në Mitrovicën e Veriut.
E gjitha kjo u konfirmua përmes një deklarate të përbashkët nga Prokuroria Speciale dhe Policia e Kosovës.
“Sot, më 01.03.2026, duke filluar nga ora 06:00, hetuesit e Drejtorisë për Hetimin e Krimeve të Luftës, të mbështetur nga Njësia Speciale Operative, kanë realizuar planin operativ ‘Syrigana’, në gjashtë (6) lokacione të ndara — pesë (5) në Komunën e Skenderajt dhe një (1) në Mitrovicën e Veriut — ku janë arrestuar pesë (5) persona të dyshuar”, ka njoftuar Policia e Kosovës.
Në fund, Policia e Kosovës po ashtu ka bërë të ditur se gjatë bastisjes janë konfiskuar armë dhe uniforma të ish-ushtrisë jugosllave.
