Andin Hoti, ministër për Punë, Familje dhe Vlerat e Luftës së UÇK-së, i cili ka qenë edhe kryetar i Komisionit Shtetëror për Personat e Zhdukur gjatë luftës në bisedimet me Serbinë, ka thënë se ish- ndërmjetësuesi i Bashkimit Evropian për dialogun, Mirsolav Lajçak, në shumë raste e ka luatur rolin e avokatit të Serbisë.
Ai ka thënë se në hartimin e dokumentit për të pagjeturit i cili është miratur në Bruksel, kanë bërë presion më shumë ndaj Lajçakut se sa ndaj Serbisë.
Në emisionin “Këndi i Debatit” në Tëvë1, Hoti ka thënë se në shumë raste kërkesat e Kosovës nuk kanë arritur në destinacionin e duhur.
“Dokumenti u bë me një presion të madh nga ana jonë, jo ndaj Serbisë, por ndaj një njeriu, që s’kam arritur kurrë me kuptuar, Lajçakun. Kemi pas një ndërmjetësim, Lajçakun, ku kur isha në Bruksel disa herë kamë kërkuar me u ballafaqua me Serbinë për nenet e atij dokumenti, dhe ai shpesh herë e ka luajtur rolin e avokatit të Serbisë. Shpesh herë kërkesat tona as nuk e arrifshin destinacionin dhe kjo u kanë një fatkeqësi për neve”, ka thënë Hoti.
Ai ka bërë të ditur se në mars do të mbahet takimi i dytë i komisionit në mes Kosovës dhe Serbisë lidhur me fatin e personave të pagjetur.
