Analisti Naim Sadiku ka komentuar aludimet se një anëtar i Familjes Jashari mund të jetë i propozuari për president të ardhshëm të Kosovës.
Sadiku, në emisionin “Info Nata” në Tëvë1, ka vlerësuar se emri i familjes Jashari është keqpërdorur shpeshherë politikisht.
Sipas tij, nëse ka pajtim nga Partia Demokratike e Kosovës dhe Lëvizja Vetëvendosje që pikërisht një emër nga kjo familje të jetë në krye të shtetit, atëherë mund të konsiderohet çështje e kryer dhe votat për president nuk do të jenë problem.
“Familja Jashari çdo herë kur ka gara për president përmendet. Është përmendur edhe nga partitë tjera, por kurrë nuk është propozuar apo mandatuar dikush prej tyre dhe madje shpesh është keqpërdorur politikisht me emrin e kësaj familjeje. A mund të keqpërdoret emri i familjes Jashari edhe nga Kurti pikërisht për të neutralizuar skenën politike, sepse po bëhen përpjekje për ta sjellë në postin e presidentit dikë nga kjo familje, kjo mbetet për t’u parë, por praktikat shpesh kanë ditur me e keqpërdor edhe emra të tillë. Nëse ka pajtim nga PDK-ja dhe LVV-ja që pikërisht një emër nga kjo familje të jetë aty, atëherë do të thotë që mund të jetë çështje e kryer dhe nuk do të jenë aspak problem votat për president”, ka thënë ai.
I pyetur nëse dikush nga kjo familje do të ishte zgjidhje e duhur, Sadiku ka theksuar se kjo mbetet për t’u parë, por ka nënvizuar se një figurë e tillë do të kishte potencial unifikues.
“Zgjidhje e duhur ose jo, natyrisht mbetet për t’u parë se si do ta ushtrojë funksionin, por që do të ishte unifikues patjetër që po, sepse do t’i neutralizonte të gjitha partitë në vend dhe do të ndikonte pozitivisht që të paktën në 4-5 vitet e ardhshme të ketë një skenë politike pa shumë dallime të mëdha”, ka theksuar Sadiku.
