Kryeministri i Kosovës, Albin Kurti, ka folur para mediave pas takimit me kryetarin e Lidhja Demokratike e Kosovës, Lumir Abdixhiku, duke nënvizuar nevojën për një marrëveshje ndërmjet partive politike për zgjedhjen e presidentit.
“U zotuam për komunikim dhe kontakte të drejtpërdrejta, që të hapim një kapitull të ri ndërmjet partive politike. E falënderova për votimin e marrëveshjeve ndërkombëtare. Tash na duhen dy të tretat për zgjedhjen e Presidentit. Ne si Vetëvendosje nuk kemi garuar me një kandidat për President gjatë zgjedhjeve. Poashtu as partitë opozitare. Duhet ta gjejmë një zgjidhje, e cila është ndërmjet këtyre tri forcave politike”, tha Kurti.
Kryeministri gjithashtu konfirmoi vizitën e tij mbrëmë në Prekaz, te familja e Jasharëve, duke shtuar se nuk ka preferenca për një kandidat të caktuar për president.
“Po isha mbrëmë në Prekaz. E kishim lënë të takoheshim me bacin Rifat. Por, për President, nuk kemi ndonjë favorizim, sepse mua më mungojnë edhe të paktën 14 vota. Nuk kam përafrim më shumë me LDK-në ose me PDK-në. Po flas për fakte objektive. Nëse ka marrëveshje me LDK-në, shkojmë te numri 81, ku nuk duhet të mungojë asnjë deputetë në sallë”, deklaroi Kurti.
Ai theksoi se zgjedhja e presidentit kërkon koordinim të kujdesshëm mes partive politike dhe se për të shmangur kriza institucionale duhet arritur një konsensus i gjerë dhe dy të tretat e votave të deputetëve.
